Македонска нација
120 години не делат откако македонскиот народ на ден Илинден 1903 година се крена со оружје во рака на востание за да ја ослободи Македонија од османската тиранија. Истовремено изминаа 79 години од АСНОМ, другиот Илинден, кога во манастирот Прохор Пчински се поставија темелите на современата македонска држава.
Овие два најкрупни датуми од нашата понова историја ги славиме благодарение на творците кои ја создадоа Тајната македоно-одринска организација. Тие со својата децениска макотрпна и систематска активност на крајот на 19 и почетокот на 20 век, успееја да внесат револуционерна свест во голем дел од македонските маси и да го подигнат неговиот борбен дух за престојната револуција. Истовремено ТМОРО, предводена од Гоце Делчев, Ѓорче Петров, Пере Тошев, Даме Груев, Димо Хаџи Димов им ја отвори вратата и на другите народности под услов да ги прифатат принципот за потпирање на сопствените сили.
На 2 август 1903 година се крена Илинденското востание. Во ова крваво и пред време кренато востание, беа ослободени градовите Крушево, Клисура и Невска, како и многу планински села. Создавањето на Крушевската република го зазема врвното место на оваа славна Илинденска епопеја. Иако со краток век, Крушевската република и Илинденското востание беа таков настан што значеше многу и за свое време и за времето на иднината.
Ниту еден настан од нашата понова историја не остави така длабоки траги во свеста на македонскиот народ како Илинден. Ниту еден настан не беше така често употребуван во натамошните борби на нашиот народ како пример за потик за борби за слобода на македонскиот народ како што беше Илинден. Меѓутоа, ниту еден настан како Илинден не беше така често и злоупотребуван, со цел да се оспори самоослободувањето на Македонците.
По Балканските и Првата светска војна македонскиот народ и неговата територија беа раскинати на три дела од страна на соседите, што доведе емиграција на маса Македонци во соседните земји и преку океанот. Иако распрснати насекаде во светот, македонскиот народ од сите три дела и од сите страни на светот го поврзуваше Илинден како заедничко дело на целиот македонски народ.
Илинден 1903 година беше потик и за антифашистичката народноослободителната борба на македонскиот народ во Втората светска војна. Партизанските единици на македонскиот народ ги носеа имињата на дејците на Македонската револуционерна организација: Гоце Делчев, Јане Сандански, Даме Груев, Пере Тошев, Питу Гули и др. Ова борба резултира со Првото заседание на АСНОМ одржано на 2 август 1944 гидина, на ден Илинден, во манастирот Прохор Пчински каде се донесени одлуки со кои се удрени темелите на македонската современа држава, која потоа дел од својот суверенитет го пренесе на повоена Југославија.
Македонската држава својот суверенитет го поврати на 8 септември 1991 година, по одржаниот успешен референдум за осамостојувањето на Македонија. По повеќе од три децении Македонија повторно е изложена на пропагандите на соседите.
Но како и во минатото, и покрај сите уцени, поткупи и заплашувања Македонците нема да се откажат од својот национален идентитет.
Да ни е честит и вековит 2 август – Македонски Илинден
АМИН!
