Македонската политика долго време живее со една траума – настаните од 27 април 2017 година. Ден кој беше претставен како „најголемиот напад врз демократијата“, по кој следуваа долги судски процеси, затворски казни за тероризам и политичка пресметка без преседан.
Но денес, една изјава повторно отвора прашања за позадината на тој ден.
Артан Груби во едно интервју изјави дека во разговор со Радмила Шекеринска слушнал дека постоело сценарио на Зоран Заев за настаните во македонското Собрание на 27 април 2017 година, со крајна цел вината да биде насочена кон ВМРО-ДПМНЕ.
Во својата изјава Груби вели:
„Контактиравме јас и Шекеринска вечерта на 26 април и се согласивме утрото на 27 април да се сретнеме со јасни пораки – јас од г. Ахмети, а таа од г. Заев. Се сретнавме во Клубот на пратениците на 27 април, каде се согласивме тој ден да го спроведеме сценариото кое го имавме подготвено многу порано, со сите текстови и сценариото за изборот на новиот претседател на Собранието, г. Талат Џафери.
Тогаш ни се придружи и г. Зоран Заев, кој потврди дека тој ден ќе го направиме тоа и рече дека ќе најави на прес-конференција дека тоа го правеше ВМРО-ДПМНЕ.“
Ако ова тврдење е точно, тогаш Македонија се соочува со нешто многу поголемо од обична политичка расправија. Се соочува со можност дека еден од најдраматичните настани во поновата историја бил искористен – или дури и поттикнат – како политичко оружје.
Што ако зад драматичните сцени, крвавите фотографии и политичките говори постоела стратегија?
Внимателно осмислена провокација која требало да создаде хаос, а потоа политички да се искористи за да се обвини ВМРО-ДПМНЕ?
Изјавата на Груби не може да се игнорира. Таа не доаѓа од случаен коментатор или од некој на маргините на политиката. Доаѓа од човек кој со години беше во самиот врв на власта и во срцето на политичките договори во земјата.
И токму затоа се отвора најнепријатното прашање: ако ова било познато – зошто се молчеше толку долго?
Зошто овие информации не се појавија кога се водеа судските процеси?
Зошто не беа изнесени кога луѓе добиваа долгогодишни затворски казни за тероризам?
Зошто јавноста за вакви тврдења слуша дури сега?
Ако постои и најмал сомнеж дека настаните од 27 април биле дел од политичко сценарио, тогаш тоа е прашање што бара сериозна и независна истрага.
Бидејќи ако се покаже дека трагедијата од тој ден била искористена за политички пресметки, тогаш станува збор за една од најголемите политички манипулации во современата македонска историја.
Прашањето е кога конечно ќе се отвори целата вистина за 27 април 2017 година — или и ова тврдење ќе заврши во добро познатиот молк на правосудството?.
