Климент Спространов ( 1857- 18, III 1931) е македонски револуционер, член на Врховниот македонско-одрински комитет, масон и донатор. Тој бил еден од основачите на фондот „Свети Климент“ во Софија во 1904 година. Спространов во фондот донирал 100.000 лева, чии приходи биле наменети за училиштата во Охрид, како и за награди за трудови на тема Македонија и македонската наука.

Климент Ангелов Спространов е роден во Охрид во 1857 година. Потекнува од познатото семејство Спространови. Неговиот татко Ангел Спространов бил учесник во Охридскиот заговор од 1880 - 1881 година, а неговиот брат Евтим Спространов бил истакнат писател, револуционер и јавна личност. Завршил гимназија во Охрид и таму работел како учител.

По Руско-турската војна, во 1880 година емигрирал во новооснованото Кнежество Бугарија и работел како писар, учител и правник во Луковит. Околу 1892 година Климент Спространов се преселил во Софија, каде што станал благајник во општина Софија. Во 1896 година учествувал на Третиот македонски конгрес, кој се одржал во Софија.

Климент Спространов станал член на Славјанското добротворно друштво во Бугарија, основано во Софија во 1899 година. Тој бил еден од основачите на фондот „Свети Климент“ во Софија во 1904 година заедно со неговиот брат Евтим, Антон Кецкаров, Георги Златарев, Стефан Дедов и други видни охриѓани. Целта на фондот била да се поддржи образовната работа и училишта во Охрид. Спространов во фондот донирал 100.000 лева, чии приходи биле наменети и за награди за трудови на тема Македонија и македонската наука.

Во ноември 1930 година, Климент Спространов донирал 20.000 лева на училишниот одбор на Луковит за да се формира фонд на негово и во името на неговата покојна сопруга Иванка Спространова, од чиј приход годишно ќе се доделува награда на ученик или ученичка од основните училишта со одлични резултати, а останатиот интерес да се потроши за учебници и учебни помагала за сиромашните ученици во истите училишта.

Спространов основал уште два добротворни фонда: „Климент Спространов“ на Македонскиот научен институт, чиј капитал бил 100.000 лева и „Цветанка Спространова“ за изградба на училишна менза во родниот Охрид, чиј капитал заклучно со декември 1929 година изнесувал 17.500 лева.

Климент Спространов починал на 18 март 1931 година во Софија.

Подготвил: Т.К.