Еврокомесарката за проширување Марта Кос во јули повторно ќе престојува во Скопје, во рамки на засилените дипломатски активности на Европската Унија кон земјите од Западен Балкан.
Нејзината посета доаѓа само неколку недели по престојот на претседателот на Европски совет, Антонио Кошта, што се толкува како сигнал дека Брисел повторно го става процесот на проширување високо на својата политичка агенда.
Посетата на Кос ќе биде нејзино прво доаѓање во Македонија по контроверзната изјава што ја даде минатата година, кога во обид да ја објасни комплексноста на идентитетските прашања во регионот, го спомена и пинџурот како дел од својата споредба. Изјавата тогаш предизвика бројни реакции во македонската јавност.
Во изминатиот период од европските претставници сѐ почесто се слушаат пораки дека геополитичките околности создаваат нов моментум за проширување на Унијата. Сепак, и покрај зголемената дипломатска активност, во Македонија останува присутна резервираноста околу процесот на евроинтеграции.
Македонските власти во повеќе наврати нагласија дека земјата останува посветена на европскиот пат, но истовремено инсистираат на јасни гаранции дека нема да има нови билатерални условувања и дополнителни пречки кои би го отежнале пристапниот процес.
Се очекува за време на посетата на Марта Кос да бидат отворени прашањата поврзани со евроинтеграциите, реформите и идните чекори во односите меѓу Македонија и Европската Унија, во период кога проширувањето повторно се наметнува како една од клучните теми на европската политичка сцена.
