Драгана Бојковска, член на Извршниот комитет на ВМРО-ДПМНЕ и пратеник, во гостувањето на телевизија Канал 5, во емисијата „Само Вистина со Видиновски“, истакна дека Изборниот законик е едно од клучните прашања за остварување на демократските права на граѓаните, особено на избирачкото право.
Таа нагласи дека посебно внимание мора да се посвети на македонската дијаспора и на олеснување на нејзиното гласање преку современи, достапни и практични модели, какви што веќе се применуваат во голем број европски држави.
„Самиот Изборен законик е толку важен што претставува остварување на најможното демократско право, тоа е избирачкото право, и нашата црвена линија во рамките на предлог Изборниот законик е токму дијаспората да има подостапно гласање. Нелогично е некој, за да си го оствари најдемократското право, да патува и по десет часови со авион“, рече Бојковска.
Таа посочи дека не станува збор за експеримент, туку за модели кои веќе постојат во Европа.
„Ние не измислуваме топла вода. Вакви практики на електронско гласање постојат во многу земји, а 16 од 27 земји членки на Европската Унија веќе користат модел по пошта. Ние предложивме модел во кој електронското гласање најнапред би се ставило како понуда, но дојдовме до неприфаќање од страна на СДС“, додаде Бојковска.
Според неа, ваквото кочење на реформскиот закон од страна на СДС доаѓа во момент кога Македонија добива позитивни сигнали од Европската комисија за спроведувањето на реформите.
„Оваа реакција на кочење на реформскиот закон, Изборниот законик, доаѓа во момент кога токму од Европската комисија имаме сигнал дека сме позитивно оценети во спроведување на реформите, добиваме пари согласно Реформската агенда и имаме дополнителна најава дека кон Македонија ќе се насочат дополнителни средства бидејќи имаме навистина голема успешност“, истакна таа.
Бојковска нагласи дека Реформската агенда има клучна улога во европскиот интегративен процес на државата и дека се очекуваат значајни финансиски средства во наредниот период.
„Реформската агенда е онаа што бележи особен успех во нашиот интегративен пат. 100 милиони евра се сума што оптимистички очекуваме да дојде со наредното финансирање“, рече Бојковска.
Таа упати критика до СДС, оценувајќи дека партијата декларативно зборува за Европската Унија, но не покажува подготвеност да поддржи конкретни реформи.
„СДС само зборува за Европската Унија, без да поддржи никакви реформи. Во делот на економијата најмалку имаат право да зборуваат, бидејќи седум години просечен раст од 1,8 проценти не се квалификува како успех, наспроти сега од 3,5 проценти седум квартали по ред“, децидна е Бојковска.
