Поранешниот турски министер за надворешни работи Мевлут Чавушоглу од Скопје упати јасна порака дека Европската Унија мора да биде отворена и искрена со земјите кандидати, а не постојано да поставува нови услови.
Мевлут Чавушоглу, шеф на турската делегација во Парламентарното собрание на НАТО и поранешен министер за надворешни работи на Република Турција, на меѓународната конференција „Дијалог за единство и мир 2026“ во Скопје, упати остри критики кон односот на Европската Унија кон Македонија.
Тој порача дека ЕУ треба да биде отворена и искрена со земјите кандидати и, доколку тие ги исполнуваат условите, да ги отвори вратите за нивно членство.
„Од Македонија се бараше да го промени знамето, името и сега се бара да прифатат дека не се Македонци. Тоа е нечуено и спротивно на основните вредности на ЕУ“, порача Чавушоглу.
Неговата изјава доаѓа во период кога македонската јавност сè погласно реагира на постојаните условувања во европскиот процес, особено кога тие навлегуваат во прашања поврзани со идентитетот, историјата и самобитноста на македонскиот народ.
Чавушоглу практично го отвори суштинското прашање што со години ја оптоварува Македонија: дали европската интеграција треба да биде процес на реформи, демократија и владеење на правото, или механизам преку кој од една држава се бара да се откажува од сопствените симболи, име и национален идентитет.
Пораката од поранешниот шеф на турската дипломатија е силна и директна: европските вредности не можат да се бранат со условувања што го негираат правото на еден народ да биде тоа што е.
