Ислам Абази, како шеф на Обвинителството за гонење организиран криминал и корупција, наместо да се бори против организираниот криминал и корупцијата, се претвори во џелат на правдата и заштитник на криминалците блиски до СДС и ДУИ.
Затворањето на постапката за случајот „Мазут“, во кој постојат сериозни сомнежи за криминал тежок 167 милиони евра, претставува скандал од огромни размери и уште еден доказ за политичкото влијание врз правосудниот систем.
Очигледно е дека послушниците на Али Ахмети, Зоран Заев и Венко Филипче повторно се активирани со единствена цел – спас на кадрите и криминалците од СДС и ДУИ од одговорност пред законите.
Влијанието на Заев, Филипче и Ахмети во правосудството е длабоко вкоренето, а случајот „Мазут“ е најдобар пример за тоа. Наместо предметот да добие судска разрешница и да се утврди вистината, постапката се затвора без одговори за јавноста.
Особено симптоматично е што истото обвинителство, пред само една година, бараше притвор за четири лица осомничени во случајот, со образложение дека постои опасност од бегство и влијание врз сведоци. Денес, истите тие обвинители, под раководство на Ислам Абази, тврдат дека немало доволно основи за продолжување на постапката.
Јавноста беше сведок на сериозни индиции за финансиски криминал, перење пари и сомнежи за еколошка штета. Дополнително, и ЕСМ поднесе жалба до повисоките судски инстанци, што само ја потврдува сериозноста на случајот.
Ваквата контрадикторност не може да се оправда со правни аргументи. Единственото логично објаснување е политички и лукративен интерес.
Затоа, го повикуваме Башким Бесими од Советот на јавни обвинители да одговори зошто Советот молчи кога е очигледно дека постои влијание врз постапувањето на обвинителството во случајот „Мазут“.
Исто така, обвинителката Катерина Коларевиќ треба да објасни како утврдила дека нема штета во предмет тежок 167 милиони евра, кога јавноста виде и слушна за сериозни сомнежи за финансиска и еколошка штета.
На крај, Ислам Абази, кадар поставен во време на СДС и ДУИ, треба да одговори до кога ќе биде во служба на политички структури и наместо спроведувач на правдата, ќе дејствува како нејзин џелат.
Македонското правосудство мора да се ослободи од личности кои ја рушат довербата во институциите. На нивно место мора да дојдат професионалци со интегритет, морален кредибилитет и капацитет, за кои правдата ќе биде единствен приоритет.
Ислам Абази треба да поднесе оставка, со цел да престанат контроверзните одлуки кои ги спасуваат криминалците од СДС и ДУИ и конечно да започне враќањето на довербата на граѓаните во судството.
