На 7 јули православните христијани го празнуваат Раѓањето на Свети Јован Крстител – Иванден, еден од најголемите летни празници во православниот календар. Свети Јован Крстител е единствениот светител, покрај Пресвета Богородица, чијшто ден на раѓање Црквата го слави како голем празник.
Нека е честит и благословен Иванден на сите кои го празнуваат, како и на сите што го носат името Јован, Јованка, Јове, Јовка, Иван, Ивана, Иво, Ивана, Јанко, Јане и сите изведени форми од овие имиња.
Според Светото Писмо, Свети Јован бил син на свештеникот Захарија и праведната Елисавета. Неговото раѓање било чудесно, бидејќи неговите родители биле во длабока старост и долго време немале деца. Архангел Гаврил му ја соопштил радосната вест на Захарија дека ќе добие син кој ќе биде избран од Бога да го подготви народот за доаѓањето на Спасителот.
Свети Јован живеел подвижнички живот во Јудејската пустина, облечен во камиласка кожа и хранeјќи се со скакулци и див мед. Тој ги повикувал луѓето на покајание и духовно очистување, крштевајќи ги во реката Јордан. Токму затоа е наречен Крстител.
Најголемиот настан во неговата мисија е крштевањето на Исус Христос во реката Јордан. При тој чин се јавила Светата Троица – Синот се крштевал, Светиот Дух слегол во вид на гулаб, а се слушнал гласот на Бог Отецот: „Овој е Мојот возљубен Син, Кој е по Мојата волја.“
Поради тоа што јавно ги осудувал неправдите и неморалниот живот на владетелот Ирод Антипа, Свети Јован бил затворен, а подоцна и погубен со отсекување на главата. Неговото мачеништво останува симбол на храброста, вистината и непоколебливата вера.
Во македонската народна традиција Иванден е поврзан и со бројни обичаи. Во многу краишта уште пред изгрејсонце се берат лековити тревки и полски цвеќиња, бидејќи се верува дека токму на овој ден тие имаат најголема исцелителна моќ. Девојките плетат венчиња од иванденско цвеќе за здравје, среќа и благослов во домот, а многу семејства го одбележуваат денот како домашна слава или именден.
Празникот потсетува на важноста на покајанието, духовното очистување, смирението и верноста кон Божјата вистина. Свети Јован Крстител останува пример за човек кој без страв ја сведочел вистината и го подготвил патот за доаѓањето на Христос.
