Македонска Нација
Лагите на Венко Филипче и СДС повторно се демантирани. Од ВМРО-ДПМНЕ велат дека опозициската партија во изминатиот период ширела дезинформации за повеќе прашања, меѓу кои и за мигрантите, државниот Буџет, ИПАРД фондовите, како и за Реформската агенда и изјавите на европските претставници.
Според партијата, Филипче и СДС со месеци ја манипулирале јавноста со тврдења дека државата се движи кон економска криза и застој, но фактите и официјалните податоци од европските институции го покажале спротивното.
„Македонија доби најмногу европски средства во регионот, во висина од 65,7 милиони евра, пред Албанија со 49 милиони евра и Црна Гора со 44,2 милиони евра“, посочуваат од ВМРО-ДПМНЕ.
Од таму додаваат дека станува збор за средства од јануарскиот извештај, а очекувањата се во јуни сумата дополнително да се зголеми, при што Македонија повторно ќе биде меѓу најуспешните држави во исполнувањето на Реформската агенда.
Според ВМРО-ДПМНЕ, Европската Унија со ова потврдила дека Македонија е лидер во реформите, а тврдењата на СДС и Филипче целосно паднале во вода.
Партијата оценува дека доделените 65,7 милиони евра се јасен показател дека реформите што ги спроведува Владата даваат конкретни резултати и добиваат признание од европските институции.
Средствата ќе бидат наменети за унапредување на образованието, дигитализацијата и подобрување на условите во училиштата, додека дел од нив ќе бидат насочени директно кон државниот Буџет, а останатите за капитални и инвестициски проекти.
„Наместо сценарија за криза и неуспех, фактите покажуваат дека Македонија напредува, добива доверба и обезбедува конкретна европска поддршка“, велат од ВМРО-ДПМНЕ.
Од партијата порачуваат дека Владата останува целосно посветена на спроведување на реформите, економскиот развој и подобрување на животниот стандард на граѓаните.
