Македонска Нација
На 31 август православните христијани го празнуваат споменот на преподобен Јован Рилски.
Преподобен Јован Рилски е еден од најпочитуваните православни подвижници на Балканот. Роден бил во селото Скрино. По смртта на родителите се замонашил и се повлекол во осаменички живот, посветен на молитва, пост и духовни подвизи.
Подоцна се населил во Рилската Планина, каде околу него почнале да се собираат монаси и верници. Неговиот духовен пример оставил длабока трага во православното христијанство. Починал во 946 година.
31 август 1903 – Битката кај Рашанец во Охридско
Во текот на Илинденското востание се водела голема битка во месноста Рашанец, кај селата Куратица, Речица и Сирула во Охридско.
Во востаничкиот логор биле засолнети голем број жители од околните села. Неговата одбрана ја сочинувале неколку стотици востаници предводени од охридските војводи и раководители.
На 30 и 31 август логорот бил опколен од многубројна османлиска војска и башибозук, поддржани со артилерија. Македонските востаници пружиле силен отпор, а борбата траела повеќе од единаесет часа. Во неа загинале 27 востаници, меѓу кои и Ангел Узунов, братот на Христо Узунов.
31 август 1903 – Жестока борба кај селото Пирин
Во Серскиот револуционерен округ, во областа меѓу Мелник и Неврокоп, биле собрани повеќе македонски востанички чети.
Османлиската команда испратила два баталјона војска против востаниците. Кај селото Пирин дошло до жестока борба, во која здружените востанички сили го одбиле нападот и ја разбиле османлиската војска. Ова било едно од позначајните вооружени дејства во Серскиот округ за време на Илинденското востание.
31 август 1924 – Убиен е Тодор Александров
Во месноста Бука, кај селото Сугарево во Мелничко, во Пиринскиот дел на Македонија, бил убиен Тодор Александров – македонски револуционер и еден од водачите на ВМРО.
Тој е роден на 4 март 1881 година во Ново Село, Штипско. Во Македонската револуционерна организација се вклучил уште како ученик, а подоцна бил учител, околиски раководител, војвода и член на Централниот комитет.
По Првата светска војна, заедно со Александар Протогеров и Петар Чаулев, учествувал во обновувањето на ВМРО. Во 1924 година го потпишал Мајскиот манифест, кој повикувал на обединување на македонските револуционерни сили и борба за независна Македонија.
Убиството на Александров предизвикало тешки внатрешни пресметки во македонското револуционерно движење. Иако извршителите биле познати, прашањето кој бил вистинскиот нарачател и денес останува предмет на различни историски толкувања.
31 август 1944 – Нападнато и запалено селото Блаце
Албански балистички формации го нападнале селото Блаце во Тетовско. При нападот биле ограбени и запалени куќи, а биле убиени и жители на селото.
Според забележаните податоци, до темел биле изгорени 13 куќи, а животот го загубиле 12 македонски родољуби. Нападот се случил во последните месеци од Втората светска војна, непосредно пред конечното ослободување на Македонија.
