Македонска Нација
Само неколку часа по завршувањето на Самитот ЕУ – Западен Балкан во Тиват, каде што оствари средби со највлијателните европски лидери, премиерот Христијан Мицкоски ја продолжи работната агенда во Македонија со нови состаноци посветени на економскиот развој и капиталните инвестиции.
Попладнево тој се сретна со претставници на стопанските комори и со раководствата на домашни градежни компании, со кои разговараше за нивното учество во реализацијата на големите инфраструктурни и капитални проекти што ги планира државата.
„По интензивната агенда во Тиват утрово и можноста за средби со лидерите на ЕУ, директно на средба со стопански комори каде разговараме со градежните компании и нивниот интерес за учество во реализација на капиталните проекти во државата“, објави Мицкоски на својот профил на Фејсбук.
Средбата претставува уште една потврда дека Владата паралелно работи на две клучни стратешки насоки – меѓународното позиционирање на Македонија и забрзувањето на домашниот економски развој.
Додека во Тиват се разговараше за европската перспектива на регионот и новите иницијативи за поблиска интеграција на земјите од Западен Балкан во европските политики и институции, во Скопје фокусот беше ставен на конкретни инвестиции, изградба на инфраструктура и отворање нови можности за македонските компании.
Ваквото темпо на активности покажува дека Премиерот Мицкоски и Владата настојуваат политичките контакти и дипломатските средби да ги преточат во економски придобивки за државата, со посебен акцент на капиталните инвестиции како двигател на економскиот раст.
Средбите со стопанството доаѓаат во период кога Владата најавува засилена реализација на инфраструктурни проекти, патна и железничка инфраструктура, енергетски капацитети и други капитални инвестиции кои треба да придонесат за повисок економски раст, нови работни места и поголема конкурентност на македонската економија.