Премиерот порача дека Македонија ќе остане посветена на европските интеграции, но без отстапки од националното достоинство и државните интереси
Премиерот Христијан Мицкоски изрази задоволство од средбите со францускиот претседател Емануел Макрон и германскиот канцелар Фридрих Мерц, одржани во рамките на Самитот ЕУ – Западен Балкан во Тиват, нагласувајќи дека европските партнери покажуваат разбирање за ставовите на Македонија во однос на евроинтегративниот процес и прашањето за уставните измени.
Во изјава за медиумите по завршувањето на самитот, Мицкоски истакна дека разговорите со европските лидери биле конструктивни и отворени.
„Со канцеларот Мерц се знаеме и од рамките на Европската народна партија, но ова беше наш прв состанок како премиери и сум исклучително задоволен од разговорот. Исто така сум задоволен и од разговорите што ги имавме со претседателот Макрон и со претседателката на Европската комисија Урсула фон дер Лајен“, изјави Мицкоски.
Тој посочи дека на средбите биле отворени и темите поврзани со уставните измени и евроинтегративниот процес.
„Нашиот став е јасен. Македонија заслужува многу повеќе од потпросечни политички медиокритети да ѝ ја кројат европската судбина. Верувам дека голем дел од земјите членки на Европската Унија го разбираат тоа. Важно е што денеска од лидерите на ЕУ беше испратена порака дека процесот на проширување е жив“, рече премиерот.
Мицкоски нагласи дека Владата ќе продолжи да работи на реформите и европската агенда, но без да дозволи загрозување на националното достоинство.
„Наша задача е да го зачуваме процесот на проширување, да напредуваме во реформите, но истовремено да не го изгубиме достоинството, како што тоа се случуваше во минатото. Нашата цел е Македонија да остане држава што испорачува најмногу реформи и истовремено да ги зачува своите национални позиции“, истакна тој.
На Самитот во Тиват свое обраќање имаше и германскиот канцелар Фридрих Мерц, кој оцени дека и Европската Унија има одредена одговорност за бавниот процес на проширување.
„Ако веќе 13 години не сме примиле нови членки, тоа покажува дека пропустите постојат и на страната на Европската Унија. И нив сакаме денес да ги надминеме“, изјави Мерц.