Премиерот порача дека Македонија останува на европскиот пат, но без нови отстапки и неизвесни ветувања.
Премиерот Христијан Мицкоски во пресрет на средбата со претседателот на Европскиот совет, Антонио Кошта, испрати јасна порака дека Македонија повеќе нема да влегува во политички процеси и отстапки без однапред да биде сигурна во конечниот исход.
„Немам намера како претседател на Владата да поддржам авантура, без притоа да знам дека ќе има извесен крај“, изјави Мицкоски, нагласувајќи дека државата веќе има горчливо искуство од претходните години кога беа правени крупни отстапки под ветување за побрза европска интеграција.
Неговата порака до европските претставници е дека Македонија останува посветена на европскиот пат, но дека повеќе нема да прифаќа решенија засновани на нејасни ветувања, дипломатски формулации и неизвесни перспективи.
Според Мицкоски, македонските граѓани веќе еднаш ја платиле цената на политиките кои се темелеле на верување дека секоја отстапка автоматски ќе донесе напредок кон Европската Унија. Наместо тоа, по промената на уставното име, следуваа нови блокади, нови условувања и дополнителни барања.
Токму затоа, Владата сега бара јасни гаранции и предвидлив процес, во кој ќе биде прецизно дефинирано што добива Македонија и кои се обврските на сите страни.
Средбата со Кошта се очекува да биде важна можност за размена на ставови околу европската перспектива на Македонија, но и за пренесување на пораката дека времето кога државата прифаќаше неизвесни политички експерименти е завршено.
Позицијата на Владата е дека европската иднина на Македонија останува стратешка цел, но таа мора да биде изградена врз заемна доверба, почитување на достоинството на македонскиот народ и јасни гаранции дека секој следен чекор ќе води кон конкретен резултат, а не кон нови пречки и условувања.
