Премиерот Христијан Мицкоски изрази оптимизам за идните чекори на Македонија на европскиот пат, нагласувајќи дека токму директните разговори што ги имал со францускиот претседател Емануел Макрон и германскиот канцелар Фридрих Мерц му даваат јасна слика за тоа што може да се очекува во наредниот период.
По завршувањето на Самитот ЕУ – Западен Балкан во Тиват, Мицкоски истакна дека е задоволен од средбите со двајцата највлијателни европски лидери и дека тие разговори биле исклучително важни за македонските интереси.
„Оптимист сум. Само јас имав средби и со Макрон и со Мерц и точно знам што следува за Македонија“, порача премиерот, оставајќи простор во наредниот период да станат појасни новите европски иницијативи за регионот.
Изјавата доаѓа во момент кога Франција и Германија презентираат идеи за нов пристап кон проширувањето на Европската Унија, со поголемо и постепено интегрирање на земјите кандидати во европските политики и институции уште пред нивното полноправно членство.
Според Мицкоски, Македонија денес има значително подобра меѓународна позиција отколку во минатото, а земјата повторно е активен и кредибилен соговорник во европските политички кругови. Тој оцени дека сѐ повеќе европски лидери ја разбираат македонската позиција и потребата европските интеграции да се водат врз основа на принципи, а не преку наметнување идентитетски условувања.
Средбите со Макрон и Мерц беа дел од серијата билатерални разговори што премиерот ги оствари на маргините на самитот во Тиват, каде главна тема беше иднината на Западен Балкан и новата динамика на процесот на проширување.
Иако деталите од разговорите не беа јавно соопштени, пораките што пристигнаа од самитот укажуваат дека проширувањето повторно станува едно од клучните прашања на европската агенда. Токму затоа, оценката на премиерот дека „точно знае што следува за Македонија“ предизвика големо внимание во јавноста и отвори очекувања дека во наредниот период би можеле да се појават нови дипломатски иницијативи поврзани со македонската евроинтеграција.
Во меѓувреме, Владата останува на ставот дека Македонија ќе продолжи активно да ги спроведува реформите и да ги исполнува европските стандарди, истовремено инсистирајќи на заштита на националните интереси, идентитетот и достоинството на македонскиот народ.
