СДС бара алиби за да не се соочи со граѓаните на предвремени избори
Ако состојбата во државата навистина е таква каква што ја прикажува Андреј Жерновски, тогаш СДС треба веднаш да побара предвремени парламентарни избори. Наместо тоа, партијата измислува сценарија и бара алиби за да го прикрие стравот од соочување со гласачите.
Андреј Жерновски тврди дека резултатите на Владата биле „нула“, дека Буџетот бил празен, дека парите биле украдени и дека Македонија се движела спротивно на европските интереси. Но ако СДС навистина верува во овие тешки обвинувања, зошто одбива да побара предвремени избори?
Во демократскиот свет опозицијата што тврди дека Владата е неуспешна, дека ја изгубила довербата и дека државата се движи во погрешна насока, бара избори. СДС, пак, го прави спротивното – секојдневно ја напаѓа Владата, а кога ќе му се понуди можност да се соочи со граѓаните, почнува да зборува за наводни сценарија, странски служби, алиби и заговори.
Жерновски вели дека Мицкоски „очајно бара алиби за избори“. Но за одржување избори не се потребни алиби, туку политичка храброст и подготвеност да се прифати волјата на народот. Ако СДС е убеден дека Владата нема резултати и дека граѓаните се незадоволни, тогаш предвремените избори би требало да бидат негова најголема шанса.
Наместо да ја прифати фрлената ракавица, СДС однапред создава оправдување за своето повлекување. Со приказните за „српски и руски служби“ се обидува да го пренасочи вниманието од едноставното прашање: дали партијата е подготвена своите тврдења да ги провери пред гласачите?
СДС не може истовремено да тврди дека Владата е без резултати, дека Буџетот е празен и дека мнозинството ја изгубило поддршката, а потоа да бега од избори. Тоа е политичка противречност што не може да се прикрие со прес-конференции и апокалиптични сценарија.
Доколку тврдењата на Жерновски се точни, СДС треба веднаш да побара распуштање на Собранието и предвремени парламентарни избори. Ако не е подготвен на тоа, тогаш неговите обвинувања служат само за создавање врева и ширење страв.
Вистината е едноставна: Мицкоски не бара алиби за избори – СДС бара алиби за да ги одбие. Партијата очигледно не се плаши од изборниот датум, туку од пресудата на граѓаните.
На избори последниот збор секогаш го има народот, а токму од тој збор СДС се плаши како ѓавол од темјан.
