Независноста не се обезбедува со пари, туку со работа, порача премиерот, оценувајќи дека судиите и обвинителите со досегашната работа не заслужиле дополнителни средства од Буџетот
Последниот Извештај на Европската комисија за владеењето на правото содржи пофалби за дел од спроведените политики, но и критики за состојбите во правосудниот систем.
Мицкоски појасни дека не станува збор за редовниот извештај за напредокот на Македонија, кој се очекува наесен, туку за анализа што Европската комисија ја изработува за земјите членки и за четири земји кандидати од регионот.
„Овој извештај е редовен извештај што го објавува Европската комисија за сите земји членки, а во последните три години и за дел од земјите кандидати. Станува збор за извештаите од 2023, 2024 и 2025 година. Од кандидатите се анализирани Македонија, Црна Гора, Албанија и Србија“, рече Мицкоски.
Според него, во документот има и меѓусебно спротивставени заклучоци. Од една страна, се констатира политички притисок врз судството и обвинителството и се бараат дополнителни финансиски средства, а од друга страна, се упатуваат сериозни критики за нивната работа и ефикасност.
„Во извештајот е констатиран притисок од политичари врз судството. Кога зборуваме за судството, тука ги вклучуваме и обвинителството и судовите. Истовремено, се наведува дека треба да има повеќе пари за обвинителите и судиите, а потоа се критикува нивната работа. Тие два заклучока се контрадикторни“, рече премиерот.
Тој нагласи дека не може истовремено да се тврди дека правосудниот систем не испорачува резултати, а од Владата да се бара да обезбеди повеќе пари.
„Од една страна велат дека судскиот систем не испорачува, а од друга страна бараат Владата да даде повеќе пари. Тие две работи не одат една со друга. Или ќе почнат да испорачуваат, па ќе добијат повеќе средства, или нема да добијат“, истакна Мицкоски.
Премиерот оцени дека меѓу граѓаните постои широко распространето незадоволство од работата на правосудниот систем и од недоволното испорачување правда. Тој најави дека ќе продолжи јавно да упатува критики и да бара реформи, преземајќи ја политичката одговорност, сè додека не се забележи реален напредок во судовите и обвинителствата.
„Повеќе пари нема да добијат затоа што не ги заслужиле. Со измените што ги направивме, добија сè што побараа во делот на вработувањата и самостојноста. Ако некој мисли дека на овој начин ќе врши притисок врз Владата, Владата нема да го прифати тоа. Независноста не се обезбедува со пари, туку со работа, а не со допишување работни часови, дежурства и проценти“, изјави Мицкоски.
