Водоводниот систем во Гостивар за помалку од четири недели е целосно прочистен, како никогаш досега, изјави денеска премиерот Христијан Мицкоски.
Главниот штаб за управување со кризи вчера соопшти дека водата од гостиварскиот водовод повторно е безбедна за пиење. Забраната за нејзина употреба беше воведена на 17 јули, откако надлежните институции утврдија дека во текот на 22 дена со пумпи била внесувана фекално загадена вода во градскиот водовод.
Заразени беа повеќе од 5.000 граѓани. На 19 јули беше прогласена епидемија, а два дена подоцна Владата прогласи 30-дневна кризна состојба на подрачјето на Гостивар.
Како потврда дека водата е безбедна, членовите на Кризниот штаб вчера се напија вода од чешма.
Мицкоски денеска нагласи дека со водоводот и со снабдувањето на граѓаните на Гостивар со вода стопанисува јавно претпријатие со сопствено раководство.
„Раководството го поставува градоначалникот, а градоначалникот беше поддржан на локалните избори од СДСМ. Затоа од СДСМ нема да слушнете дека бараат одговорност од градоначалникот, бидејќи тој е нивен кадар, туку ќе слушнете дека бараат одговорност таму каде што ја нема. Напротив, Владата даде сѐ што можеше состојбата да се нормализира, како никогаш досега. Обвинителството и МВР веќе водат истрага за тоа зошто во минатото, иако имало голем број извештаи според кои квалитетот на водата во Гостивар не бил задоволителен и не соодветствувал со правилникот, ништо не било преземено од некои претходни министри. Ценам дека опозицијата треба повеќе да се посвети на тоа и да даде одговор, бидејќи тие министри биле од нивните редови. Можеби треба лично да ги прашаат зошто не постапувале“, рече Мицкоски.
Изјавата ја даде по отворањето на новата спортска сала во Основното училиште „Круме Кепески“ во скопската Општина Кисела Вода.
Премиерот рече дека Владата во изминатите четири недели секојдневно обезбедувала по два до три шлепери, односно приближно од 50 до 60 тони вода за пиење. Помошта се доставувала додека системот не бил доволно прочистен и параметрите за квалитетот на водата не го достигнале потребното ниво. Техничка вода, според него, била обезбедена уште по првата недела.
„Од овој момент натаму, грижата целосно ја презема јавното претпријатие што ја обезбедува услугата, односно гостиварскиот водовод. Што се однесува до одговорноста, знам дека Обвинителството постапуваше и дека се обезбедени неколку лица. Обвинителството и МВР сѐ уште постапуваат и истрагата не е завршена. Таа треба да продолжи до крај, сѐ додека не бидат опфатени сите што имаат и најмала одговорност и не се утврди кој е виновен за состојбата со која се соочивме“, кажа Мицкоски.
Основното јавно обвинителство во Гостивар на 21 јули соопшти дека отворило истрага, по што судот им определи 30-дневен притвор на директорката на гостиварското јавно претпријатие „Комуналец“ и на двајца раководители на сектори.
Тие се осомничени за тешки дела против животната средина и природата. Според Обвинителството, тројцата дале налог за поставување пумпи преку кои непречистена вода се мешала со водата за пиење, што довело до масовно заболување на граѓаните.
