Пратеникот на ВМРО-ДПМНЕ, Бране Петрушевски, во интервју за емисијата „Траги“ на Алсат-М се осврна на поднесените измени на Законот за пратениците, со кои се предлага пратениците да не можат да имаат двојно државјанство. Според него, со ова законско решение ВМРО-ДПМНЕ сака да ги демантира тврдењата на СДС дека пратеници од партијата поседуваат бугарски пасоши.
Петрушевски оцени дека СДС, како опозициска партија, е „неинвентивна и без кредибилитет“ и дека во изминатиот период пласирала повеќе тврдења за владејачката партија кои, според него, времето ги демантирало.
„Подолг временски период, ние во принцип имаме една опозиција во СДС којашто е тотално неинвентивна, без никаков кредибилитет, со никакви идеи и предлози со кои би се легитимирале пред гласачкото тело.
Што прават тие?
Тие измислуваат одредени, условно кажано, афери коишто потоа низ медиумите ги шират, држат секој ден прес-конференции. Говореа дека требало да има и мигранти коишто не биле прифатени во Британија, па ќе биле депортирани во Македонија, па требаше во пролетта да има избори итн. Ги наведувам сите оние лаги коишто времето ги демантираше, а нормално и ние како претставници на власта“, изјави Петрушевски.
Тој додаде дека една од темите што СДС ја отворала во јавноста била поврзана со наводното поседување бугарски пасоши од страна на пратениците на ВМРО-ДПМНЕ.
„Една од таквите теми коишто избра СДС да ја замајува јавноста беше и дека ВМРО-ДПМНЕ, односно пратениците на ВМРО-ДПМНЕ, сите имале бугарски пасоши и затоа не им било важно, условно кажано, членството во ЕУ и ги блокирале уставните измени.
Држеа прес-конференции, банални, смешни и секој кој барем малку нè познава знае дека е апсолутна невистина“, рече Петрушевски.
Според него, токму поради овие тврдења биле поднесени измените на Законот за пратениците.
„За да го демантираме сето тоа пред целокупната јавност, ние поднесовме измени на Законот за пратениците со коишто се забранува пратеник да има двојно државјанство. Таков принцип на функционирање има веќе во некои законски решенија. Сме имале ваква пракса и порано, во којашто мора да имаш само исклучиво македонско државјанство за да стапиш на одредена функција. Истото го предложивме сè со цел да ги демантираме лагите и невистините коишто ги лиферуваа од страна на СДС“, истакна Петрушевски.
