Македонска Нација
Наместо конструктивна дебата за Изборниот законик, опозицијата избра политички театар, парламентарна опструкција и блокада на реформите.
СДС повторно покажува дека, кога нема политичка визија, посегнува по блокади. Ако досега со години ја туркаа темата за внесување на Бугарите во Уставот без јасни и цврсти гаранции за Македонија, сега истиот модел на кочење го префрлија врз Изборниот законик.
Веќе не е тајна кому му одговара Македонија да не напредува и да остане заглавена на патот кон полноправно членство во Европската Унија. Секој ден, од различни страни, пристигнуваат пораки дека уставните измени не би биле последното барање, туку само почеток на нови притисоци, нови условувања и нови отстапки — за македонската историја, македонскиот јазик, македонскиот идентитет и постоењето на македонската нација.
Но она што најмногу ги вознемирува граѓаните во Македонија и Македонците во дијаспората е фактот дека токму македонски политички партии, СДС и Левица, избираат да ја кочат сопствената држава. Наместо да покажат одговорност во момент кога Македонија треба да испорача реформи, тие избраа блокади, амандмански театар и создавање политички хаос.
Ова не е само спор околу еден закон. Ова е прашање дали државата ќе оди напред или ќе остане заложник на партиски калкулации и во интерес на нашиот источен сосед..
Сега, најверојатно, и на структурите во Европската Унија им станува сè појасно дека СДС не води политика на конструктивна опозиција, туку политика на опструкција. На секој можен начин се обидуваат да го забават напредокот на Македонија, само за да создадат впечаток дека државата не оди напред.
Измените на Изборниот законик се дел од реформските обврски на Македонија и во голем дел се поврзани со усогласување со препораките на ОБСЕ и ОДИХР. Наместо конструктивен пристап, СДС и Левица избраа политички театар, свесни дека секое одложување создава штета за државата, за институциите и за европскиот реформски процес.
Позицијата на ВМРО-ДПМНЕ е јасна. Подготвени сме да разговараме за сите предлози што придонесуваат за подобар, поправеден и поефикасен изборен процес. Но истовремено остануваме цврсти на определбата македонската дијаспора да добие можност полесно да го оствари своето демократско право, вклучително и преку електронско гласање на претседателските избори.
Секој македонски граѓанин, без разлика каде живее, има право да биде дел од демократските процеси во Македонија. Дијаспората не смее да биде третирана како проблем, како товар или како бројка што некому не му одговара. Таа е нераскинлив дел од македонската држава, од македонскиот народ и од иднината на Македонија.
Или вистината е сосема друга?, Венко Филипче се плаши откако го избрка народот од сопствената држава, денеска тој се противи истите тие луѓе кои си отидоа надвор од државата токму поради него и Зоран Заев, да гласаат по електронски пат.
Очигледно е дека стравот од изборен пораз ги обедини СДС и Левица повеќе отколку која било политичка идеја. Наместо да понудат визија, тие нудат блокади. Наместо реформи, произведуваат кризи. Наместо да разговараат за подобри правила, се обидуваат да го закочат целиот процес.
Ставот на ВМРО-ДПМНЕ е цврст: реформите ќе продолжат, институциите ќе функционираат, а граѓаните во Македонија и Македонците во дијаспората сами ќе дадат оценка кој работи за државата, а кој работи само за сопствен дневнополитички спас.
Македонија мора да оди напред. А секој што ја кочи Македонија, ја кочи и волјата на народот.