Кога треба да се гласа за законите што ги бараат европските стандарди, СДС исчезнува од Собранието и избира опструкции наместо одговорност.
СДС постојано зборува за европски вредности, реформи и европски пат. Но, кога ќе дојде моментот тие зборови да се претворат во дело, ги нема никаде. Тогаш европските вредности стануваат само празна реторика, а реформите — партиска алатка за дневнополитички пресметки.
Не е проблем ако опозицијата има различно мислење. Во демократија тоа е нормално. Проблемот е што СДС со години се претставува како единствен заштитник на европската агенда, а кога во Собранието треба да се гласа за законски решенија кои се дел од реформскиот процес, одбива да даде поддршка. Не гласаа за ниту едно законско решение, ниту во 2024, ниту во 2025 година.
Тоа веќе не е опозиција. Тоа е политичка опструкција.
Уште посимптоматично е бегството од работната група за Изборниот законик. Таа работна група не спроведува ничија партиска агенда. Не работи за ВМРО-ДПМНЕ, ниту против СДС. Нејзината задача е да ги имплементира препораките на ОБСЕ и ОДИХР — стандарди кои ги бара Европската Унија и стандарди за кои СДС јавно тврди дека ги поддржува.
Но, кога треба да се работи, СДС бега.
Затоа се поставува едноставно прашање: што точно значи европскиот пат за СДС? Дали европските вредности за нив важат само кога се на власт? Дали реформите се добри само кога тие ги предлагаат? Има ли СДС некаква друга европска агенда, различна од онаа што ја бара самата Европска Унија?
Одговорот станува сè појасен. За СДС, Европа е збор што се користи во прес-конференции, но не и обврска што се исполнува во Собрание.
Не е важно дали една партија е на власт или во опозиција. Ако навистина ѝ мисли добро на државата и на граѓаните, таа мора да ги поддржи законите кои се во интерес на Република Македонија. Тоа е минимумот на политичка зрелост. Тоа е минимумот на конструктивност. СДС не го исполнува ниту тој минимум.
Неделава беа дополнети Предлог-законот за судска служба, Предлог-законот за јавнообвинителска служба и Предлог-законот за користење на енергија од обновливи извори. Усвоени беа и Предлог-законот за високи раководители, како и Предлог-законот за оружје.
Ова се законски решенија кои се дел од реформскиот пакет и од обврските што Македонија треба да ги испорача. Наместо да даде поддршка за процесите што ги бараат европските стандарди, СДС повторно избира бојкот, блокада и политичко лицемерие.
Македонија и годинава ќе биде прва во регионот затоа што ќе ги испорача обврските, ќе ги донесе законите и ќе ја исполни Реформската агенда. Тоа е разликата меѓу работа и празна реторика. Меѓу одговорност и опструкција. Меѓу вистинска европска агенда и партиски театар.
Доколку СДС продолжи со политиката на здружување со ДУИ и од опозиција се обиде преку блокади да го забавува реформскиот процес, ВМРО-ДПМНЕ нема да дозволи државата да стане заложник на нивните политички калкулации.
Приоритетот останува јасен: исполнување на реформската агенда, носење на неопходните законски решенија и заштита на интересите на граѓаните и на Република Македонија.
Европскиот пат не се брани со говори. Се брани со работа, со гласови во Собранието и со одговорност пред народот. А токму таму СДС повторно падна на испитот.
