Владата започна со дистрибуција на пакувана вода во Гостивар, секој ден ќе се делат по 50.000 литри
Поднаслов: Првите количини веќе се доставени на повеќе пунктови низ градот, а дистрибуцијата ќе продолжи секојдневно додека трае забраната за користење на водата за пиење.
Владата започна со дистрибуција на пакувана вода за пиење во Гостивар, како мерка за поддршка на граѓаните по забраната за користење на водата од градскиот водовод.
Првата пратка од 50.000 литри пакувана вода беше доставена вечерва и веднаш започна нејзината распределба на повеќе пунктови низ градот.
Директорот на Службата за општи и заеднички работи на Владата, Ивица Томовски, кој пристигна во Гостивар со првата испорака, изјави дека додека трае кризата секојдневно ќе се доставуваат по 50.000 литри вода.
– Секој ден ќе дистрибуираме по 50.000 литри пакувана вода. Таа ќе се дели на шест или седум пунктови, а доколку има потреба ќе бидат отворени и дополнителни локации за да се избегнат гужви и чекање на високите температури – изјави Томовски.
Во координација со локалните волонтери, водата се дистрибуира на повеќе локации, меѓу кои:
- Водостопанство – Гостивар;
- Градинката „Пролет“;
- Средното економско училиште;
- ЈП „Национални шуми“ – Подружница „Шар“;
- АД ЕСМ – Подружница кај гаражите (Питарница);
- Општата болница „Ферид Мурад“;
- Територијалната противпожарна единица;
- Градскиот плоштад.
Паралелно со владината акција, во Гостивар се организираат и хуманитарни иницијативи на компании, организации и поединци кои обезбедуваат пакувана вода за граѓаните. Преку локалната самоуправа, вода се дистрибуира и за лицата во социјален ризик.
Дистрибуцијата ќе продолжи и во наредните денови, сè додека водата од гостиварскиот водовод не биде прогласена за безбедна за употреба.
