Советничката група на ВМРО-ДПМНЕ во Советот на Град Скопје изразува згрозеност од однесувањето на советниците на Левица, кои ја критикуваа можноста деца од социјално загрозени семејства бесплатно да заминат на летен камп.
Наместо да ја поддржат мерката, која директно им помага на децата и на семејствата на кои поддршката им е најпотребна, советниците на Левица одлучија неосновано да ја критикуваат.
Политичките разлики не смеат да бидат поважни од интересите на децата, особено кога станува збор за деца кои, поради материјалната состојба на своите семејства, можеби никогаш немале можност да заминат на летен камп и да ги доживеат истите искуства како своите врсници.
За нас е несфатливо некој да води политичка пресметка токму врз грбот на најранливите категории граѓани.
Советничката група на ВМРО-ДПМНЕ ќе продолжи да ги поддржува сите мерки што обезбедуваат еднакви можности за децата во Скопје, без оглед на материјалната состојба на нивните семејства, се наведува во соопштението.
