САВО КОСТАДИНОВСКИ
НАРОДНИТЕ ПРАЗНИЦИ И ОБИЧАИ ВО МАКЕДОНИЈА
Со Христовата света рожба,
а со него и христијанската вера,
целиот свет зачекорил
во ново време, во нова ера.
Се родиле и низа празници редум,
во чест на Христос и Богородица света.
Ги празнува нив и македонскиот народ,
како сите христијани по цела планета.
Кога црковни, кога народни празници;
кога обичаи, познати од века;
ги слави нашиот македонски народ –
со искрена радост постојано ги чека.
БАДНИК
Во чест на христовото рождество,
нашиот Бог вечен,
секоја година се празнува
бадникова вечер.
Молбено, пред икона
секој пали свеќа.
За деца, за млади и стари,
секој да има среќа.
Се дели кравајче со сребрена пара,
„касмет“ за оној што ја зеде!
Надвор се пали коледарски оган,
и гласно се пее „Коледе-леде“!
Вечерта свечена вечера следи,
пред јадење се моли и се крсти,
во име на христијанската вера,
во име на трите крстни прсти.
БОЖИК
Ние, христијаните од целиот свет,
со гордост Божик го славиме,
и на таков величествен начин
голема почит му оддаваме.
На Божик е роден Христос
од Богородица Марија Света,
и за себе оставил слава
за многу вечни лета.
Во името на божјиот син
уште многу празници празнуваме:
Велигден, Ѓурѓовден, Спасовден,
Крстовден, Духовден, сите ги чествуваме.
