Мане Јаковлески
Зошто лидерот на СДС, Венко Филипче, упорно молчи додека политичари од нашиот источен сосед македонскиот народ го нарекуваат „северномакедонци“ – навредлив термин што директно удира врз македонскиот идентитет, народ и историја?
Дополнително, скандалозно е што личности блиски до оваа партија отворено го негираат делото на Гоце Делчев и ја омаловажуваат македонската историја, а од партиското раководство нема ниту збор осуда.
Тоа не е случајност, туку јасен показател за политиката што ја води СДС – политика на виткање кичма, бришење на националното достоинство и отворање врата за нови понижувања и уцени кон Македонија. Наместо цврсти црвени линии и државнички став, државата повторно се турка во позиција да прифаќа туѓи диктати, навреди и историски фалсификати.
Во време кога македонскиот идентитет е под постојан напад, Македонија има потреба од единство, достоинство и лидерство што ќе застане во одбрана на националните интереси. Но, наместо тоа, Филипче и СДС избираат тишина, калкулации и политички компромиси, оставајќи впечаток дека личната амбиција за власт им е поважна од Македонија и македонскиот народ.
Дали ваквото однесување е резултат на политичка слабост, лични интереси или, пак, станува збор за притисоци и уцени поради кои не смеат јавно да ги бранат македонските национални интереси и молчат пред навредите и понижувањата кон сопствениот народ и држава?
