Рашела Мизрахи Ми велите животот ќе биде блескав само треба да престанам да се викам Рашела. Ќе ме види целиот свет, само треба да престанам тврдоглаво да се викам Рашела. Само име е… ќе го изгребеме и избришеме.
Ми велите животот ќе биде блескав само треба да престанам да тврдам дека сум дел од моето семејство. И што толку сум запнала да бидам дел од едно просечно, обично, македонско семејство.
Ќе го изгребеме и избришеме.
Ми велите животот ќе биде блескав само треба да ги заборавам гробовите на баба ми и дедо ми. И зар се толку важни загинатите партизани, борци и антифашисти, па зар мора нивните надгробни плочи да ми ја коваат иднината.
Ќе ги изгребеме и избришеме.
Ми велите животот ќе биде блескав, доколку ги премолчам БДЖ вагоните до Треблинка. Па од нив нема ниту пепел. Како воопшто сакам да ги помнам убиените и нивните убијци. Пепелта нека оди со ветрот.
Да ги изгребеме и избришеме.
Ми велите да ги заборавам Мирче Ацев, Лиман Каба, Марија Естреја Овадија, децата од Ваташа… ма како да ги заборавам илјадниците кои ги дадоа своите животи за Македонија?!
Ми велите да заборавам сѐ!
Ми велите не бидувај ниту таа пепел, ниту надгробните плочи, ниту семејството, ниту името… не бидувај!
Биди ништо!
Ми велите да не постојам, да ме нема и животот ќе биде блескав.
А за кого животот ќе биде блескав кога ќе нѐ нема???
Јас немам друго јас.
И ова што го барате од мене е сѐ што имам. Ова што го барате е сѐ што љубам.
А кога за она што го љубам плукаат по мене и го нарекуваат кочница кон блесокот на иднината, јас останувам да сведочам и за пепелта, и за партизаните, и за семејството, и за своето постоење. Достоинствено, онака како што се брани вистината кога е сооочена со насилство и лаги. Зошто овие наши вистини се преголеми за да бидат замолчени!!!
Не, Македонија не ја заслужува таа ,,блескава” понуда за живот, туку вистински пат со светла и сигурна европска иднина.
Зошто ВИСТИНАТА е ултимативна ЕВРОПСКА ВРЕДНОСТ!!!
