Најголема штета од блокирањето на Изборниот законик од страна на СДС, Левица и ДУИ нема да претрпи ВМРО-ДПМНЕ, туку македонските граѓани кои живеат надвор од државата, изјави портпаролот на ВМРО-ДПМНЕ, Валентин Манасиевски.
Според него, со месеци се воделе разговори за усогласување на новото законско решение, со цел да се обезбеди поширок политички консензус и да се олесни остварувањето на избирачкото право на македонските иселеници.
Манасиевски оцени дека наместо договор, СДС, Левица и ДУИ го блокирале процесот и, како што рече, ги ставиле сопствените партиски интереси пред интересите на десетици илјади македонски граѓани кои живеат и работат надвор од државата.
Тој нагласи дека предложените измени требало да овозможат поедноставни и подостапни процедури за гласање на дијаспората, со што би се зајакнало учеството на иселениците во демократските процеси.
Од ВМРО-ДПМНЕ порачаа дека ќе продолжат да се залагаат за донесување на нов Изборен законик и за решение што ќе им овозможи на македонските државјани во дијаспората полесно да го остваруваат своето уставно загарантирано право на глас.
