На локалитетот Беш Тепе Анче, во близина на Карбинци, штипските археолози открија античка камена гробница, единствена од ваков вид во Македонија.

Слична гробница е пронајдена во југо-источна Бугарија. Археологот Митко Штерјов вели дека името на топонимот говори дека овде имало пет тепиња, односно могили, од кои останале три, а  во една од нив е пронајдена гробницата која датира од првиот до третиот век од нашата ера.

- Се работи за ѕидана гробница со речен камен со дијаметар 6 метри и висина од 2,5 метри. Самото тоа укажува дека се работи за некоја позначајна личност од аристократија во римското време или некој од владетелите на овие простори, рече Штерјов.

Понатамошните истражувања и артефактите ќе ги дадат и деталите за начинот на погребувањето и точното датирање на гробницата. Беш Тепе Анче е локалитет за чие истражување средства одвои министерството за култура во рамките на програмата за финасирање на проекти од национално значење.