Генералниот секретар на ВМРО-ДПМНЕ и пратеник Драган Ковачки, во гостување во емисијата „Заспиј ако можеш“ на Алфа телевизија, упати критики кон СДС, оценувајќи дека опозициската партија треба повеќе внимание да посвети на сопствената организација и коалициски односи, наместо на политички напади кон ВМРО-ДПМНЕ.
Според Ковачки, СДС се соочува со сериозни внатрешни предизвици и потребно е да ја преиспита својата реторика и политичка насока.
„СДС може да зборуваат што сакаат, но треба малку повеќе да погледнат во сопствените редови. Наместо да се занимаваат со ВМРО-ДПМНЕ, кое ќе ги порази на следните парламентарни избори кога и да се одржат, треба да внимаваат на сопствената коалиција и на сопствените фронтови кои однапред им се пробиени и можат да им донесат штета. Треба да ја променат реториката и да се вратат на сопствената идеологија, која ја изгубија во периодот кога беа во Владата под раководство на ДУИ“, изјави Ковачки.
Осврнувајќи се на реформските процеси, Ковачки оцени дека за време на владеењето на СДС бил реализиран само мал дел од предвидените реформи, додека актуелната власт, според него, покажува поголема ефикасност во нивното спроведување.
Тој истакна дека претходната власт правела отстапки кои, според неговата оценка, биле на штета на националниот идентитет, историјата, културата и традицијата, додека сегашната Влада е фокусирана на спроведување на реформската агенда.
„СДС во текот на своето владеење не ги реализираше најголемиот дел од реформите што ги најавуваше. Наместо тоа, беа гласни кога стануваше збор за отстапки на сметка на националниот идентитет, историјата, културата и традицијата. Денес ситуацијата е поинаква – Владата е посветена на реформите и токму затоа кај СДС постои страв и паника, па сè потешко наоѓаат начин како да ја напаѓаат власта“, рече Ковачки.
Во своето гостување тој се осврна и на политиките на лидерот на СДС, Венко Филипче, во однос на националните прашања, оценувајќи дека дневнополитичките пресметки околу теми поврзани со државните интереси се штетни и мора да престанат.
„Да се прави дневно политикантство од националните интереси и на тој начин да им се дава муниција на оние што бараат Македонија да се покори е штетно за државата, за народот, па дури и за самата партија што го прави тоа. За жал, токму такво политикантство гледаме секојдневно. Националните интереси не смеат да бидат средство за дневна политика и тоа мора да престане. Често велам дека Венко Филипче се однесува како адвокат по службена должност на Бугарија. Некои го нарекуваат и специјален претставник, но суштината е иста. Начинот на кој комуницира со јавноста и ја потенцира македонската необединетост, наместо да придонесе за национално единство, покажува дека станува збор за политика која не ѝ носи добро на татковината“, истакна Ковачки.
