Пратеничката на СДС, Бисера Костадиновска-Стојчевска, повторно потврди дека за нејзината партија македонскиот јазик претставува тема за дневнополитички настапи и прес-конференции, наместо поле за сериозна и одговорна институционална работа.
Додека таа, како што наведуваат од Министерството за култура и туризам, патувала во странство со државни средства наместо активно да ги извршува своите пратенички обврски, надлежните институции работеле на воспоставување механизми за системска заштита и унапредување на употребата на македонскиот јазик.
Од Министерството потсетуваат дека Законот за употреба на македонскиот јазик беше донесен во јануари 2024 година, а по завршувањето на сите законски и собраниски процедури, во јули 2025 година започна со работа Инспекторатот за употреба на македонскиот стандарден јазик – прва институција од ваков вид во историјата на државата.
Во моментов е во тек постапка за вработување на петмина инспектори по македонски јазик, кои ќе поминат соодветна обука и процес на лиценцирање. Истовремено, се прибираат детални податоци од државните институции за бројот на вработени лектори и степенот на почитување на законските обврски, по што Инспекторатот ќе преземе конкретни активности и мерки.
Дополнително, формирана е и работна група за изработка на Националната стратегија за македонскиот јазик, која веќе работи на подготовка на стратешките документи за негов развој и заштита.
Во реакцијата се посочува дека наместо политички спектакли и јавни обвинувања, потребен е сериозен и одговорен пристап кон прашањата што се од национално значење.
„Македонскиот јазик не е политичка битка, туку државна и национална обврска. Тој не се брани со прес-конференции и партиски пресметки, туку со конкретни политики, институции и резултати“, се наведува во реакцијата.
Од Министерството оценуваат дека вистинските резултати се постигнуваат преку работа и институционална посветеност, а не преку политички маркетинг и партиски игри.
