Со месеци тврдеа дека Македонија нема реформи и дека уставните измени се единственото решение, а по позитивните оценки од Европската Унија фокусот го префрлија на гласањето на дијаспората
Во изминатите месеци претседателот на СДС, Венко Филипче, и раководството на партијата речиси секојдневно ја сведуваа политичката дебата на две теми – внесувањето на Бугарите во Уставот и тврдењата дека Македонија не ги спроведува реформите потребни за напредок кон Европската Унија.
Според нивните настапи, уставните измени беа претставувани како неизбежен и единствен услов за продолжување на европските интеграции, иако од македонска страна постојано се укажуваше дека за таков чекор нема јасни гаранции дека ќе претставува последно барање на патот кон членството во Европската Унија.
Напротив, во јавноста сè почесто се отвораше прашањето дали по евентуалните уставни измени би следувале и нови условувања поврзани со историјата, идентитетот и македонскиот јазик.
Во исто време, СДС тврдеше дека Македонија нема реформски капацитет и дека Владата ја оддалечува државата од Европската Унија.
Меѓутоа, во меѓувреме од Брисел пристигнаа поинакви пораки. Европската комисија ја вброи Македонија меѓу трите земји од Западен Балкан што покажале најголем напредок во спроведувањето на реформите во рамките на Планот за раст, поради што се очекува да добијат и дополнителна финансиска поддршка.
Оваа оценка е во директна спротивност со тврдењата на СДС дека Македонија не спроведува реформи и дека државата стагнира.
По позитивните оценки од Европската Унија, темите што со месеци беа во прв план – уставните измени и наводниот недостаток на реформи – речиси исчезнаа од политичката реторика на СДС. Наместо нив, фокусот се префрли на измените на Изборниот законик и правото на глас на македонската дијаспора.
Наместо повторно да се отвора прашањето за уставните измени или за реформите, денес главните критики се насочени кон предлозите што треба да им овозможат на македонските државјани кои живеат во странство полесно да го остварат своето уставно право на глас.
Премиерот Христијан Мицкоски јавно порача дека е подготвен да се разговара за модел што ќе го олесни гласањето на дијаспората, без разлика дали тоа ќе биде преку електронско гласање, гласање по пошта или преку друго решение што успешно функционира во демократските држави.
„Еве јас кажувам јавно, дајте да најдеме начин како да го зголемиме гласањето на дијаспората. Не е важно дали тоа ќе биде електронско или со писма, дајте да најдеме начин, да најдеме пракса во светот, како им успеале на тие луѓе да им овозможиме правото на гласање да го остварат на поедноставен начин“, изјави Мицкоски.
Со оваа порака Владата предлага разговор за решение што ќе овозможи поголемо учество на македонските државјани во изборниот процес, без разлика каде живеат.
Останува прашањето дали СДС ќе прифати разговор за модел што ќе го прошири демократското право на глас или ќе продолжи да се спротивставува на иницијативите што имаат цел да ја зголемат вклученоста на македонската дијаспора.
Истовремено, се наметнува политичката дилема дали промената на темите – од Бугарите во Уставот и реформите кон гласањето на дијаспората – претставува обид да се избегне дебатата по позитивните оценки што Македонија ги добива за спроведените реформи и за напредокот во рамките на европскиот План за раст.