Антонио Милошоски, пратеник од редовите на ВМРО-ДПМНЕ, во гостување во централниот Дневник на Сител телевизија истакна дека ВМРО-ДПМНЕ останува на јасниот став дека уставни измени не треба да се прават доколку тие ја водат државата во нова неизвесност, без конкретни гаранции за остварување на полноправно членство во Европската Унија.
„По однос на тоа прашање ние сме јасни, сме го искажале нашиот став. Ние не сметаме дека уставните измени треба да се направат, а притоа таквиот чекор да нè однесе во неизвесност и да бидат направени за нешто за коешто не може да ја постигнете целта“, посочи Милошоски.
Тој потсети дека Македонија веќе имала едно такво искуство со уставните измени поврзани со уставното име на Република Македонија, кои, како што рече, СДС и ДУИ ги промовирале како чекор што ќе ги отвори вратите на ЕУ.
„Тогаш СДС и ДУИ ги промовираа како уставни измени по однос на уставното име на Република Македонија, дека тоа ќе ги отвори вратите на ЕУ, дека ќе има бесплатно здравство, бесплатни вакцини, стипендии, беше таа една голема кампања, но видовме дека наместо отворање на поглавјата и преговори со ЕУ, ние добивме затворена врата пред нос од страна на Франција, а потоа и од соседна Бугарија“, нагласи Милошоски.
Милошоски е дециден дека Македонија не смее повторно да влегува во процес на уставни измени без јасни и цврсти гаранции дека ќе се зачуваат националниот идентитет, јазикот и историската посебност на македонскиот народ.
„Поучени од тоа искуство, сметаме дека би било лековерно да се оди во уставни измени, а притоа да немате извесност во процесот дека ќе си зачувате своја национална посебност и дека ќе стигнете до целта како полноправна земја членка на ЕУ“, заклучи Милошоски.
