Премиерот Христијан Мицкоски порача дека Македонија од последна станала прва во групата Западен Балкан 6 и најави нови успеси на Владата во периодот што следи.
„Сите оние кои што се молат да не успее оваа Влада, на тој начин се молат да не успеат и државата и граѓаните. За жал, имам лоша вест за нив – ќе мора да сведочат на многу успеси кои што ги прави оваа Влада“, рече премиерот на Република Македонија, Христијан Мицкоски.
Тој посочи дека Владата ветила дека Македонија од последна во групата Западен Балкан 6 ќе стане прва, и дека тоа веќе се потврдува преку извештаите.
„Фактите се дека рековме – од последни во групата Западен Балкан 6 ќе бидеме први. Се зафативме со жестока работа веднаш по завршувањето на локалните избори и еве, веќе во јануарскиот извештај сме први“, појасни премиерот.
Мицкоски истакна дека Владата има интензивна комуникација со претставниците на Европската комисија и дека очекува позитивната позиција на Македонија да биде потврдена и со јунскиот извештај.
„Имаме интензивна комуникација со господинот Гертијан Копман, работиме на сите портфолија во рамките на Владата и очекувам оваа позиција да ја потврдиме и по јунскиот извештај. Очекувам оние 30-тина, односно 31 милион евра директна буџетска поддршка, до крајот на годината да се приближат до бројката од 100 милиони евра директна буџетска поддршка“, истакна Мицкоски.
Премиерот нагласи дека кога на тоа ќе се додадат и средствата предвидени за финансирање проекти, вкупната сума ќе достигне неколку стотици милиони евра.
„Кога на тоа ќе се додадат и средствата предвидени за проекти, таа бројка ќе биде неколку стотици милиони евра и така продолжуваме во периодот кој што следи“, рече Мицкоски.
Осврнувајќи се на критиките од опозицијата, премиерот потсети на повеќе, како што рече, неуспешни обиди за создавање негативна атмосфера.
„Се сеќавате како ликуваа кога излезе интервјуто на известувачот Вајц во нивните омилени бугарски медиуми, а потоа ги немаше да го коментираат кога господинот Вајц јасно кажа дека има реформи, што, впрочем, со овој извештај го потврди и Европската комисија“, рече Мицкоски.
Тој потсети и на тврдењата дека ќе дојде мигрантски бран, како и на обвинувањата дека државата е пред банкрот.
„Ни велеа дека ќе доаѓал бран мигранти. Еве дојде мај месец, ќе помине и мај месец, а нема мигрант како резултат на договорот со Обединетото Кралство. Се сеќавате дека минатата година водеа кампања дека само што не сме банкротирале, а ние денеска велиме дека, и покрај сите предизвици во светот и во Европа, имаме успеси во македонската економија“, изјави премиерот.
Мицкоски додаде дека Македонија бележи позитивни економски резултати.
„Според растот на бруто домашниот производ сме во првите три, односно во првите пет во Европа, колку тоа и да наиде на потсмев кај одредени структури“, рече Мицкоски.
Премиерот нагласи дека целта на Владата е да се бори за граѓаните, да го испорача ветеното и да ги исправи, како што рече, погрешните политики од претходниот период.
„Целта на оваа Влада е да се бори за граѓаните, да го испорачува тоа што го ветила, истовремено да ги исправи сите погрешни политики кои беа политики на ограбување, политики на грабеж, политики на понижување, себеомаловажување и коленичење“, истакна тој.
Според Мицкоски, тие политики оставиле голема трага, но Владата успешно работи на нивно коригирање.
„Тие политики оставија голема трага и, за жал, ние ќе мора уште некое време да се занимаваме со сето тоа што беше уништено во седум години Влада на СДСМ и ДУИ. Но, сега сме прилично успешни во тоа“, рече премиерот.
На крајот, Мицкоски порача дека Владата ќе продолжи да испорачува резултати.
„Имам лоша вест за сите оние кои сѐ би дале оваа Влада да не успее и Македонија да не успее. Ќе мора да ги гледате успесите на Владата уште долго време, а наскоро само пред малите екрани, бидејќи ќе бидете политичко минато“, порача премиерот Христијан Мицкоски.
