Премиерот Христијан Мицкоски соопшти дека реконструкцијата на Владата претставува почеток на нова фаза во работењето на извршната власт, по изминатите две години исполнети со стабилизација на состојбите, поставување темели и реализација на значајни проекти.
Тој истакна дека во следниот период фокусот ќе биде ставен на уште поголема ефикасност, динамика и испорака на конкретни резултати за граѓаните.
„Оваа реконструкција на Владата означува почеток на нова фаза. Сега следува период во кој фокусот уште повеќе ќе биде ставен на ефикасноста, динамиката и испораката на резултати за граѓаните. Нова енергија за ново забрзување“, порача Мицкоски.
Тој нагласи дека принципите на одговорност, достапност и целосна посветеност остануваат непроменети за сите функционери.
„Граѓаните очекуваат темпо, дисциплина и резултати, а токму тоа ќе биде обврска на секој член на Владата“, рече премиерот.
Во рамки на реконструкцијата, Мицкоски ги соопшти и новите кадровски решенија.
За министер за социјална политика, демографија и млади е предложен досегашниот заменик-министер Ѓоко Велковски.
Министерството за здравство ќе го преземе Сашо Клековски, досегашен директор на Фондот за здравствено осигурување. На неговото досегашно место ќе дојде Златко Перински, кој ќе раководи со Фондот, додека за министер за локална самоуправа е предложен Иван Стоилковиќ.
За министер без ресор задолжен за интеграција и имплементација на Стратегијата за инклузија на Ромите е предложен Ерџан Демир.
Мицкоски информираше дека коалицискиот партнер ВРЕДИ ќе предложи нови министри за ресорите правда, култура и туризам, како и односи меѓу заедниците, додека ЗНАМ ќе предложи кандидат за Министерството за земјоделство, водостопанство и шумарство.
Дополнително, Владата ќе го укине ресорот за добро владеење како посебна функција на потпретседател на Владата. Надлежностите ќе преминат директно во Кабинетот на премиерот, каде ќе биде назначен секретар задолжен за следење на доброто владеење.
Премиерот соопшти и дека е постигнат договор Демократска партија на Турците да стане дел од владината коалиција со свој претставник како министер без ресор.
Со тоа Владата ќе го задржи истиот број министерства, но ќе има двајца потпретседатели помалку во споредба со претходниот состав.
Покрај владините промени, беа најавени и кадровски решенија во рамките на ВМРО-ДПМНЕ. За нов претседател на Општинскиот комитет во Кичево е избран Дејан Пандилевски, во Битола Горан Исков, а во Прилеп Христијан Тунески. Актуелниот градоначалник на Прилеп, Дејан Проданоски, ќе биде предложен за нов член на Извршниот комитет на партијата.
Истовремено, за нов претседател на Унијата на млади сили е избран Тодор Конески, додека досегашниот владин портпарол Марија Митева ќе ја предводи Унијата на жени.
На крајот од своето обраќање, Мицкоски нагласи дека сите кадровски промени имаат една јасна цел – внесување нова енергија и забрзување на реформскиот процес.
„Сите овие смени имаат за цел да внесат нова енергија, да додадат вредност во квалитетот на работењето и на Владата и на партијата.
Новата енергија е нов импулс за уште повеќе работа, новата енергија е ново забрзување – забрзување на реформите, забрзување на економијата, забрзување на капиталните инвестиции и забрзување на промените што граѓаните ги очекуваат и заслужуваат.“
