По повод 35-годишнината од независноста на Република Македонија, во текот на целиот месец се организираат бројни активности и манифестации, чија цел е прославата да им се доближи на граѓаните и да го зајакне чувството на заедништво и припадност кон државата.
Марија Митева, член на Извршниот комитет на ВМРО-ДПМНЕ, во гостувањето во емисијата „Тема на денот“ на телевизија Сител истакна дека организацијата на централната прослава претставува голем и сложен зафат, во кој се вклучени голем број луѓе.
„Од организациски аспект, ова е голем зафат, затоа што станува збор за голема организација и за многу луѓе кои се зад камерите, за сето ова да изгледа достоинствено и, според мене, величествено и да може да се реализира еден ваков голем настан“, изјави Митева.
Таа посочи дека целта на Владата била да се организира манифестација од висок ранг, која ќе создаде трајни вредности и ќе остави значајна трага во културната историја на Македонија.
Митева нагласи дека посебно внимание е посветено на безбедноста и непречениот проток на големиот број граѓани кои се очекува да присуствуваат на централниот настан на 8 Септември. За таа цел бил воспоставен систем со кој однапред би се отстраниле можните недостатоци во текот на денот.
„Безбедноста мора да биде приоритет на Владата, за да не се доведеме во ситуација граѓаните подоцна да прашуваат зошто не било предвидено дека ќе има огромни редици пред влезот на Градскиот стадион. Одлучивме да примениме систем кој не е нов, туку веќе се користи при организирање големи настани, за однапред да ги отстраниме сите недостатоци што би можеле да се појават во текот на денот“, рече Митева.
Таа очекува спектакуларен настан кој ќе претставува кулминација на одбележувањето на Денот на независноста. На централната прослава ѝ претходеа повеќе настани организирани по повод 35 години независна Македонија.
„Целта на Владата уште од самиот почеток не беше сè да заврши со една протоколарна прослава, со положување свежо цвеќе или со централна свечена академија во рамките на институциите. Целта беше да го поттикнеме чувството на припадност, затоа што независноста не им припаѓа на институциите, ниту на Владата сама по себе, туку им припаѓа на граѓаните“, посочи Митева.
Според неа, организирањето настани ширум Македонија овозможува прославата да биде поблиску до народот и секој граѓанин да почувствува дека е дел од заедничкото одбележување.
„Колку повеќе ја доближуваме прославата до граѓаните преку настани ширум Македонија, толку посилно тие ќе почувствуваат дека ова е наша заедничка држава, дека прославуваме заедно и дека прославата навистина им припаѓа на граѓаните“, заклучи Митева.
