СДС со месеци ја заплашуваше јавноста со приказни за наводни мигрантски кампови и масовен прилив на мигранти во Македонија. Денес фактите целосно ги демантираат нивните тврдења. Април помина, мај помина, а веќе е средина на јуни и од најавуваниот „бран мигранти“ нема ниту трага.
Наместо сценарија за мигрантска криза, Македонија добива нови инвестиции, развојни проекти и модерна инфраструктура што ќе придонесе за економски раст и подобра поврзаност на државата.
Премиерот Христијан Мицкоски денеска јасно порача дека тврдењата на СДС се покажале како невистинити и дека во државата нема мигранти, ниту пак ќе има, како што со месеци тврдеше опозицијата. Тој потсети дека јавноста беше изложена на постојани политички обвинувања и обиди за создавање паника, според кои Македонија требаше да стане центар за сместување мигранти и неуспешни баратели на азил. Но денес фактите зборуваат поинаку.
„Требаше во април да имаме бран на такви лица, еве средина на јуни е, нема и нема ниту да има“, изјави Мицкоски.
Уште кон крајот на минатата година премиерот јавно ги отфрли шпекулациите за мигрантски кампови и порача дека додека тој ја предводи Владата нема да има прифаќање мигранти во Македонија. Тогаш предупреди дека ваквите тврдења се дел од политичка кампања чија цел е создавање страв и несигурност кај граѓаните.
Неколку месеци подоцна, фактите покажуваат дека предупредувањата на СДС биле без основа. Нема мигрантски бранови, нема кампови и нема сценарија што опозицијата ги претставуваше како извесна иднина за државата.
Наместо тоа, Владата е насочена кон реализација на крупни инфраструктурни проекти. Еден од најзначајните е изградбата на брзата железничка пруга долж Коридорот 10, која ќе ја поврзе Македонија со северниот и јужниот сосед и ќе претставува нова развојна артерија за државата.
Според Мицкоски, овој проект ќе донесе побрз транспорт на патници и стоки, поголема економска активност, нови инвестиции и подобра регионална поврзаност. Брзата пруга треба да ја зајакне позицијата на Македонија како важен транспортен и логистички центар на Балканот.
Така, додека СДС со месеци говореше за мигранти и ширеше загриженост кај јавноста, Владата работеше на проекти што ќе ја модернизираат државата и ќе создадат услови за долгорочен економски развој. Разликата е очигледна – едните нудеа страв и шпекулации, а другите најавуваат инфраструктура, инвестиции и нови можности за граѓаните.
