Претседателката Гордана Сиљановска-Давкова од Братислава порача дека Македонија очекува еднаков третман во процесот на европската интеграција и оценување исклучиво според Копенхашките критериуми, а не преку билатерални спорови кои не се дел од европското законодавство.
На заедничката прес-конференција со словачкиот претседател Петер Пелегрини во Братислава, Сиљановска-Давкова истакна дека државата заслужува можност целосно да се посвети на реформите, наместо енергијата да ја троши на билатерални прашања.
– Бараме да бидеме третирани како сите останати и вреднувани според Копенхашките критериуми – да добиеме можност да се фокусираме на реформите, наместо да ја губиме енергијата на билатерални прашања што немаат врска со духот и словото на Копенхашките критериуми – изјави претседателката.
Таа нагласи дека интеграцијата на Западен Балкан во Европската Унија не е само политичко прашање, туку и прашање од безбедносно и стратешко значење во време на сериозни геополитички промени.
– Не е доволно да бидете охрабрувани со децении. Процесот на интеграција во ЕУ значи исполнување на Копенхашките критериуми и европеизација во сите сфери на општеството. Без разлика дали се работи за мали или големи држави, Западниот Балкан отсекогаш историски, културно и логично припаѓал на Европа и треба да го најде своето место во неа – порача Сиљановска-Давкова.
Според неа, интегрирањето на земјите од Западен Балкан во Европската Унија ќе придонесе за надминување на поделбите и ќе стави крај на феноменот на „балканизација“ и на вештачките граници меѓу Истокот и Западот.
Претседателката го поздрави и ставот на Словачка дека идентитетските и културните прашања не треба да бидат предмет на политички условувања и преговори, нагласувајќи дека Македонија високо го цени ангажманот на земјите кои бараат рационален и правичен пристап кон европската интеграција на регионот.
– Навистина очекуваме разбирање, а не поттикнување на употребата на ветото во врска со кластерите и поглавјата. Меритократски, според заслугите – тоа е суштината на Европската Унија. Ќе влеземе тогаш кога ќе личиме на оние што веќе се членки на Европа. Често велам дека сум уморна од тоа да живеам во „егзотична“ држава – сакам да живеам во досадна европска држава. Досадната европска држава е заснована на принципи и вредности. Тоа е она по што треба да бидеме оценувани – истакна претседателката.
Словачкиот претседател Пелегрини порача дека проширувањето на Европската Унија мора да биде фер, предвидлив и процес заснован на исти правила за сите земји кандидати.
– Ставот на Словачка е јасен – стабилен, просперитетен и европски ориентиран Западен Балкан е во стратешки интерес на цела Европа. Ние сме партнери кои го поддржуваат европскиот пат на Македонија и сметаме дека довербата во Европа се темели на правила и добрососедски односи. Нашата амбиција не е да бидеме судии, туку да придонесеме за почитување на европската перспектива на регионот и достоинството на сите вклучени страни – изјави Пелегрини.
Посетата на Сиљановска-Давкова на Словачка доаѓа во период кога Македонија повторно ја актуализира потребата од деблокирање на евроинтегративниот процес и доследна примена на принципот на еднаквост за сите земји кандидати за членство во Европската Унија.
