ВМРО-ДПМНЕ порача дека е подготвено да го прифати договорот на опозициските партии за изборните реформи, под услов да се обезбеди реално и поедноставно остварување на избирачкото право на македонските државјани во дијаспората.
На денешната средба на работната група за Изборниот законик, по иницијатива на ВМРО-ДПМНЕ, повторно беше отворено прашањето за можноста македонските државјани кои живеат во дијаспората полесно да го остварат своето право на глас.
Како што истакна пратеникот Бојан Стојаноски, на средбата биле побарани ставовите на останатите политички партии за евентуално придвижување во однос на претходните разговори.
„Нашиот став беше да дадеме можност во законот и да отвориме простор дијаспората да се изјаснува по модел различен од сегашниот.
Првично предложивме електронско гласање, а потоа, поради различните ставови на опозицијата, го изменивме предлогот во гласање по пошта.
Предложивме начинот на гласање да биде регулиран со подзаконски акт што ќе го донесе Државната изборна комисија најдоцна до 30 септември 2028 година“, рече Стојаноски.
Тој посочи дека од опозициските партии било соопштено дека нивните ставови остануваат непроменети.
Според него, коалицијата предводена од ВМРО-ДПМНЕ, заедно со ВЛЕН и ЗНАМ, понудила нов пристап, со кој опозициските партии најнапред треба меѓусебно да ги усогласат своите различни позиции.
„Им предложивме на СДС, ДУИ, Левица и другите опозициски партии да седнат и да се договорат за сите прашања околу кои имаат различни ставови. Тоа се една изборна единица, моделот на финансирање, постапката за приговори и поплаки, како и моделот за гласање на дијаспората“, истакна Стојаноски.
Тој нагласи дека ВМРО-ДПМНЕ ќе го прифати секое решение што ќе произлезе од договорот на опозициските партии.
„Сè што ќе договорат Левица, СДС, ДУИ и другите опозициски партии – во делот на финансирањето, поплаките, една изборна единица и сите останати детали – ќе го прифатиме, сè додека биде прифатен нашиот основен став, а тоа е дијаспората да може да го остварува своето уставно загарантирано право на глас и да се изјаснува на изборите“, порача Стојаноски.
