Извршниот комитет на ВМРО-ДПМНЕ донесе одлуки за избор на нови претседатели на три општински комитети, како и на Унијата на млади сили и Унијата на жени на партијата.
Промените, според претседателот на ВМРО-ДПМНЕ и премиер, Христијан Мицкоски, имаат цел да внесат нова енергија и дополнително да ја зголемат ефикасноста во работењето на партијата и институциите.
За нов претседател на Општинскиот комитет на ВМРО-ДПМНЕ во Кичево е избран Дејан Пандилевски, кој го наследува Лазе Јакимоски. Мицкоски истакна дека Јакимоски успешно ја извршувал функцијата претседател на комитетот, а во иднина ќе остане посветен на обврските како заменик-министер во Министерството за јавна администрација.
Во Битола, нов претседател на Општинскиот комитет е Горан Исков, актуелен директор на АД ЕСМ „Молика“, кој доаѓа на местото на пратеникот Пеце Милевски. Милевски продолжува со своите партиски активности како заменик на генералниот секретар и ќе делува во Изборната единица 5.
За претседател на Општинскиот комитет во Прилеп е избран Христијан Тунески. Мицкоски го опиша како млад, талентиран и перспективен кадар, од кого очекува да внесе нова енергија во организацијата. Досегашниот претседател на комитетот и актуелен градоначалник на Прилеп, Дејан Проданоски, ќе биде предложен за нов член на Извршниот комитет на партијата.
Со овие кадровски решенија, како што посочи Мицкоски, се комплетира структурата на сите општински комитети на ВМРО-ДПМНЕ.
Покрај промените во општинските комитети, за нов претседател на Унијата на млади сили е избран Тодор Конески, додека за нова претседателка на Унијата на жени е избрана Марија Митева, која досега ја извршуваше функцијата портпарол на Владата.
„Сите овие смени и во рамките на партијата и во рамките на Владата имаат за цел да внесат нова енергија и да додадат вредност во квалитетот на работењето. Новата енергија е нов импулс за уште повеќе работа, ново забрзување на реформите, економијата, капиталните инвестиции и промените што граѓаните ги очекуваат и заслужуваат“, истакна Мицкоски.
