Марија Митева, член на ИК на ВМРО-ДПМНЕ, во гостување во емисијата „Ноќно студио“ на 4ТВ порача дека ВМРО-ДПМНЕ е целосно подготвено за избори кога и да се случат, потенцирајќи дека анкетите покажуваат силна доверба од граѓаните кон партијата и Владата.
Митева истакна дека Владата располага со стабилно парламентарно мнозинство и е фокусирана на реализација на владината програма, реформите и инвестициите кои се ветени пред граѓаните.
„Ако го гледаме теснопартискиот интерес, можеби веќе утре би имале избори, затоа што анкетите покажуваат несомнена доверба во ВМРО-ДПМНЕ. Но, ако го гледаме државниот интерес, сметаме дека државата не треба повторно да се воведува во изборен циклус кој ќе одземе време и финансиски средства“, истакна Митева.
Таа нагласи дека ова е година на сериозни инвестиции и реформи и дека Владата останува посветена на реализација на проектите во интерес на граѓаните.
Во однос на опозициската СДС, Митева оцени дека партијата се соочува со сериозна идентитетска криза, кадровска неподготвеност и недостаток на визија и програма.
„Во СДС е очигледна паниката околу можноста за предвремени избори. Не поддржаа укинување на техничката влада, иако претходно тоа го бараа. Излегуваат од работни групи за реформски закони, а истовремено држат прес-конференции дека се за Европската Унија и европска Македонија“, посочи Митева.
Таа додаде дека ВМРО-ДПМНЕ останува стабилна и подготвена политичка сила, без разлика кога ќе се одржат изборите.