Таму каде што Зоран Заев застана со, како што велат од ВМРО-ДПМНЕ, антидржавната политика, сега продолжува Венко Филипче
Од партијата велат дека со прифаќањето и потпишувањето на, како што ги нарекуваат, капитулантските договори, Заев започнал со бришење на терминот „македонски“, додека Филипче, како чувар на „заевата фотелја“ во СДС, е подготвен да ја впише, според нив, непостоечката и навредлива придавка „северномакедонски“.
„СДС и Филипче не само што немаат проблем што дел од соседите не нарекуваат со тој термин, туку тие се горди на своето дело и за нив тоа претставува голем успех“, стои во соопштението.
Од ВМРО-ДПМНЕ обвинуваат дека Филипче и СДС водат антинационална и антидржавна политика, која, според нив, е во интерес на бугарските власти.
„Само за нив нема ништо лошо Бугарија да го негира нашето постоење пред 1944 година, нашите револуционери и дејци да бидат нивни и нашиот македонски јазик да го сметаат за дијалект на бугарскиот јазик. Ова негирање СДС и Венко Филипче дури и не го гледаат“, наведуваат од партијата.
Во соопштението се додава дека Филипче и СДС се единствените кои, како што велат, повикуваат на прифаќање на бугарскиот ултиматум и бараат итно спроведување на уставните измени.
Од ВМРО-ДПМНЕ сметаат дека тоа е првиот чекор од сетот барања кои, според нив, Бугарија јасно најавува дека ќе следуваат и понатаму.
„Ова само докажува дека СДС и Венко Филипче се на иста линија со Бугарија, барањата, ставовите и речникот им се исти. Нема разлика меѓу официјална Софија, СДС и Филипче“, се вели во реакцијата.
Од партијата оценуваат дека ваквото однесување претставува делување против државните и националните интереси и повторно го повикуваат Филипче да одговори на прашањата кои, како што велат, му ги поставуваат во јавноста.
Воедно, му упатуваат апел да, како што наведуваат, почне да работи и делува во заштита на македонските интереси, наместо да биде „главен лобист на бугарската агенда“.
Од ВМРО-ДПМНЕ порачуваат дека на Македонија ѝ се потребни јасни гаранции дека уставните измени ќе бидат последното барање и последната отстапка на евроинтегративниот пат, што, според нив, може да се постигне само со национален консензус меѓу домашните политички чинители.
„Влезот на Македонија во ЕУ треба и мора да биде достоинствен, како што прилега на една горда и исправена држава, со исполнети Копенхашки критериуми, а не понижена со национални и идентитетски отстапки“, се наведува во соопштението.
