Скопје изминатите два дена беше домаќин на 4. Форум за културна дипломатија „Скопје 2026“, кој годинава се одржа под мотото „Од крстопати кон поврзувања: Културната дипломатија и иднината на глобалниот дијалог“.
На форумот учествуваа дипломати, политичари, експерти, уметници и јавни личности од Македонија, САД, Германија, Франција, Унгарија, Словенија, Хрватска, Србија и Црна Гора, кои дискутираа за улогата на културата како средство за поврзување на народите и градење меѓусебна доверба во време на глобални предизвици.
Настанот беше организиран од Кабинетот на поранешниот претседател на Република Македонија, д-р Ѓорге Иванов, Меѓународниот центар Алијанса на цивилизациите (ICAC) и Институтот за културна дипломатија од Берлин, со поддршка на Министерството за култура и туризам и други државни институции.
Свеченото отворање се одржа во Министерството за надворешни работи и надворешна трговија, каде беше организирана воведна сесија и панел-дискусија на тема „250 години подоцна: Демократијата, културната моќ и значењето на глобалниот дијалог во свет во промени“.
По повод 250-годишнината од основањето на Соединетите Американски Држави, учесниците разговараа за значењето на демократијата, културната дипломатија и меѓународниот дијалог во зајакнувањето на довербата, соработката и стабилноста во современиот свет.
На отворањето се обратија министерот за надворешни работи и надворешна трговија Тимчо Муцунски, вршителот на должност амбасадор на САД Никол Варнес, поранешниот претседател Ѓорге Иванов, директорот на Институтот за културна дипломатија Марк Донфрид и композиторот и пијанист Дуке Бојаџиев. Воведни обраќања имаа и претседателот на Извршниот одбор на ICAC, Иван Иванов, додека модератор беше поранешниот македонски амбасадор во САД, Васко Наумовски.
Во своето обраќање, Иванов истакна дека демократијата не е завршен проект, туку постојан процес на обновување на институциите, слободите и човековото достоинство. Тој нагласи дека културната дипломатија останува еден од најважните инструменти за градење доверба и разбирање меѓу народите и цивилизациите.
Во рамки на форумот беше одржана и сесијата „Лидерството и културата како мостови меѓу цивилизациите“, во Кабинетот на претседателката Гордана Сиљановска-Давкова, која се обрати пред учесниците.
Во Собранието на Република Македонија се одржа панелот „Улогата на демократските институции во културниот дијалог: Од претставување до кохезија“, на кој говореше претседателот на Собранието Африм Гаши. На оваа сесија учествуваа бројни домашни и меѓународни претставници од политиката, културата и дипломатијата.
Посебно внимание беше посветено и на проектот „Скопје 2028 – Европска престолнина на културата“. Во Музејот на Град Скопје беше организирана сесија посветена на културата, креативноста и културната дипломатија, во соработка со Министерството за култура и туризам и Град Скопје.
На оваа сесија се обрати министерот за култура и туризам Зоран Љутков, по што следеше панел-дискусија на тема „Визија за иднината: Скопје 2028 и моќта на креативноста“, на која учествуваа истакнати македонски уметници и културни дејци, меѓу кои Дејан Пројковски, Рисима Рисимкин, Братислав Димитров, Ана Дурловски и Гере Трипков.
Форумот уште еднаш ја потврди важноста на културната дипломатија како средство за продлабочување на меѓународната соработка, меѓусебното разбирање и промовирањето на културните вредности во современиот свет.
