Владата предводена од ВМРО-ДПМНЕ продолжува со мерки насочени кон зајакнување на економијата, отворање нови работни места и намалување на невработеноста, при што посебен акцент е ставен на младите и нивното активно вклучување на пазарот на трудот.
Преку Оперативниот план за вработување за 2026 година се предвидени мерки и програми што треба да придонесат за отворање на илјадници нови работни места, поддршка на претприемништвото и развој на работната сила. Планот опфаќа над 10.000 лица, а за неговата реализација се обезбедени речиси 40 милиони евра.
Една од клучните мерки е програмата „Самовработување – претприемништво“, преку која се очекува отворање на повеќе од 2.000 нови работни места. Дополнително, со мерката „Поддршка за креирање нови работни места“ ќе се овозможи вработување на над 1.500 лица. Со овие две мерки директно ќе бидат поддржани повеќе од 3.500 граѓани.
Посебен фокус е ставен на младите како двигател на економскиот развој. Оперативниот план за 2026 година предвидува програми за самовработување, практикантство, обуки и активности за зголемување на конкурентноста и вештините на младата работна сила, со цел создавање долгорочни ефекти врз пазарот на трудот.
Во рамки на планот е предвидена и стимулација за вработување на млади лица во производните капацитети. Околу 3.500 млади до 23-годишна возраст ќе добиваат младински додаток во висина од 3.000 денари месечно, што претставува дополнителен поттик за нивно вклучување во работниот процес.
Минатата година за првпат беа воведени мерки што директно ги таргетираат младите, што претставува значаен чекор во справувањето со младинската невработеност. Резултатите од Програмата за самовработување, преку која беа отворени околу 2.200 нови деловни субјекти, покажуваат дека ваквиот пристап дава конкретни резултати во поттикнувањето на претприемништвото и економската активност.
Според предвидувањата, околу 6.000 млади лица до 29-годишна возраст ќе бидат опфатени со мерките од Оперативниот план за 2026 година. Со тоа Владата продолжува да ја реализира својата политика за создавање поактивен, поконкурентен и поинклузивен пазар на труд.
Целта на овие политики е не само намалување на невработеноста, туку и создавање услови за подобар животен стандард, економска стабилност и задржување на младите во Македонија преку обезбедување нови можности за работа и професионален развој.
