Македонска Нација
За време на седумгодишното владеење, СДС и ДУИ го исполниле правосудниот систем со свои кадри и послушници, кои наместо по закон, носат одлуки во корист на поединци блиски до власта.
Од ВМРО-ДПМНЕ ја оценуваат како скандалозна одлуката на ЈО ГОКК, под раководство на Ислам Абази, да ја стопира постапката за, како што велат, криминал тежок 167 милиони евра поврзан со набавката на мазут за ТЕЦ Неготино, каде што постоеле сомнежи и за перење пари и нанесување штета на животната средина.
Во соопштението се наведува дека, иако јавноста видела сериозни индиции за тежок криминал, обвинителството не пронашло доволно докази, со што од кривична одговорност биле спасени Васко Ковачевски од СДС, Асмир Јахоски, син на пратеник од ДУИ, како и нивни партнери.
Од партијата сметаат дека ова не е случајна одлука, туку доказ за влијанието што, според нив, сè уште го имаат Венко Филипче, Али Ахмети и Зоран Заев врз делови од обвинителството и судството.
ВМРО-ДПМНЕ тврди дека Ислам Абази, како шеф на ЈО ГОКК, имал надлежност и обврска да биде информиран за текот на предметот, како и можност да одлучи случајот да продолжи или да биде предаден на друг обвинител.
„Наместо да биде обвинител кој ќе гони организиран криминал и корупција, Ислам Абази си ја препишал улогата на судија и дал согласност да се затвори случај тежок 167 милиони евра пред истиот да влезе во судска постапка“, наведуваат од партијата.
Според ВМРО-ДПМНЕ, ова е првпат случај од ваков јавен интерес да биде затворен уште пред да стигне до суд, поради што сметаат дека одлуката е донесена врз „лукративно-политички“, а не правни основи.
Партијата предупредува дека со ваквото постапување ЈО ГОКК се претвора во институција што, наместо да гони криминал, ќе работи во корист на осомничени и обвинети за тежок криминал, а штетата, како што велат, ќе ја плаќаат граѓаните преку државниот буџет.
Воедно, ВМРО-ДПМНЕ истакнува дека чесните обвинители ќе продолжат да го носат товарот на недовербата во правосудниот систем.
На крајот, партијата го повикува Ислам Абази да поднесе оставка, со цел, како што наведуваат, да се ослободи системот од кадри кои наместо правда носат неправда и дополнително го разградуваат правосудниот систем.