Љубомир Цуцуливски
РАДИКАЛНИ ЕГОИСТИ И СОЛИПСИСТИ.
Кога албанските политички лидери одлучно тврдтат дека ако резултатите од Референдумот нема да бидат според нивниот ќеиф (влез во НАТО) и дека во таков случај не можат да ја гарантираат стабилноста на Државата, ниту лојалноста на етничките Албанци кон Република Македонија, всушност кажуваат кој ќе ја предизвика дестабилизацијата.
Тоа, според нив, би биле етничките Албанци, неводејќи сметка дека во македонската држава не постојат само Албанци и дека во неа постојат различни интереси (како и меѓу самите Албанци) и дека сите интереси (чии и да се) мораат еднакво да се почитуваат, а не да се оди со радикализираната теза „Или сѐ ќе биде по мое или сѐ ќе отиде…“
Вака може да размислуваат единствено луѓе кои се несоцијализирани и без чувство за постоењето на другите. Значи, кои се радикални егоисти и солипсисти.
Од друга страна, тврдејќи дека не можат да ја гарантираат лојалноста на македонските Албанци (изјава на Исмет Рамадани) Албанците ги третираат како несвесна и послушна маса, која е нивна сопственост и која на секој нивен повик позитивно ќе одговори.
Од трета страна, овие лидери (ако воопшто се тоа) не водат сметка дека ако дојде до немири и евентуални судири, тогаш во нив нема да бидат вклучени само некои. Во тој случај, ќе страдаат сите – и Македонците, и Албанците, и Србите, и Турците, и Власите, и Ромите…, бидејќи оружјето не знае за етнички исклучоци и тоа треба да им го кажат на „своте“ Албанци. Односно, овие лидери треба да научат дека силата/насилието само сила/насилие раѓа и дека тоа не знае за исклучоци.
И, конечно, треба да го прочитаат барем Хераклит, кој со презир гледал на оние кои мислеле дека од крвта со крв можат да се очистат, бидејќи тоа е исто како да се мисли дека од насилието со насилие може да се ослободат.
