Свекрва
СДСМ за век и веков ја изгуби довербата кај Македонците
Во интервју за ТВ Сител, Никола Груевски, поранешниот премиер и екс претседател на ВМРО ДПМНЕ Никола Груевски, по заминувањето од земјата, неодамна го даде првото интервју за ТВ Сител. Меѓутоа тоа е само еден мал дел од интервјуто, а другото не беше презентирано во јавноста.
Во нецелосното интервју дадено за ТВ Сител, Груевски говори за политичкиот прогон, причините поради кои заминал од земјата и побарал политички азил во Унгарија, како и за тоа дека земјата ја напуштил по стандардна процедура. Односно по доаѓањето во унгарската амбасада во Албанија, поради безбедносни причини било одлучено да биде префрлен во Будимпешта.
Во интервјуто Груевски, говори дека мислел да оди во затвор. Меѓутоа, по дознавањето од добро информирани и доверливи лица дека му се спрема ликвидација во затворот, тој одлучил наместо во затвор да замине од земјата и побара политички азил во Унгарија. Истовремено, Груевски укажува дека претходно немал контакти со властите на Унгарија, како ни со властите на Албанија, Србија и Цена Гора, земји преку кои поминал за да на крај стигне во Будимпешта.
Груевски не кажа кој може да стои позади неговата потенцијална ликвидација, ниту како ја поминал македонско-албанската граница, оставајќи на актуелните власти да откријат како заминал од земјата. Единствено што спомна се веќе познати работи во јавноста, дека албанско – црногорската и црногорско-српската граница ја поминал со лична карта, додека српско-унгарската ја поминал со документ кој му бил издаден во амбасадата на Унгарија во Тирана.
Во тој контекст, екс премиерот и екс лидерот на најголемата опозициона партија, во своето интервју вели дека земјата ја напуштил многу едноставно, негирајќи дека имал помош од актуелните власти. Потоа, по доаѓањето во Албанија се пријавил во амбасадата на Унгарија од каде што побарал политички азил и од таму по извршените консултации бил транспортиран од нивна страна во Унгарија. Имено, тој ја одбрал Унгарија бидејќи таа држава е членка на ЕУ и НАТО каде се води сметка за правото и каде има независни институции.
Во однос на неговите претходни изјави дека нема да избега од Македонија, Груевски во своето прво интервју дадено по напуштање на земјата, напомнува дека уште во минатата година му рекол на премиерот Зоран Заев дека може да го уапси “ако да се откаже од спроведувањето на Тиранската платформа, од нанесување на штета на државата и од апсење на неговите соработници”. Меѓутоа, како што вели Груевски: “Заев не се откажа од Тиранската платформа, ниту го сочува името на државата, туку го смени на многу дрзок и безобразен начин, а плус потпиша штетен договор со Бугарија и уапси сè што стигна”.
Вистината секогаш победува, без разлика на сите напори таа да се прикрие. Имено, тоа што сега не е објавено целото интервју, не значи дека кога тогаш нема да излезе на виделина. Јасно е дека власта се плаши од вистината и оттука таа сака по секоја цена да го затвори Никола Груевски. Затоа по неговото интервју, во кое тој вели дека во Будимпешта е привремено и дека еден ден ќе се врати во Македонија, Социјалдемократскиот сојуз во Македонија соопшти дека земјата добива свое место во НАТО и дека „бегалецот од правдата Никола Груевски ќе го добиел своето место во затворската келија“.
Навистина е парадоксално оние што го прекршија Уставот и законите на македонската држава (промена на името по спогодбата од Преспа, прифаќањето на Тиранската платформа и воведување двојазичност во земјата, како и Договорот со Бугарија), наместо да одговараат за повреда на националните и државните интереси, тие да се на власт и да се закануваат со затвор на луѓето кои сакаа да го сочуваат македонското име и идентитет.
Сегашните власти колку и да сакаат преку своите режимски медиуми да ги прикријат работите, не успеваат. Народот е мудар и двапати нема да се фати на јадицата на СДСМ. Како што помогна на власт да дојде оваа марионетска влада, така народот ќе и пресуди. Особено по непочитување на вољата од референдумот од 30 – ти септември 2018 г., кога со громогласен бојкот кажа НЕ на промената на уставното име. Народот повторно ќе ја каже својата пресуда на претседателските и евентуално предвремените или редовните парламентарни избори.
Може слободно да се каже дека по сите досегашни потези, СДСМ за век и веков ја изгуби довербата кај Македонците. Од друга страна ВМРО ДПМНЕ остана единствена голема македонска парија која ги штити македонските државни интереси и која набргу ќе се врати на политичката сцена како апсолутен победник. Тогаш улогите ќе се сменат и Груевски сигурно ќе се врати во земјата. И како што најавуваат преставниците на сега најголемата опозициска партија заедно со интелектуалците кои стануваат се погласни ќе започне ревизија и реставрација на се што уништија социјалдемократите, заедно со своите албански партнери од ДУИ.
Уништената држава на македонскиот народ мора да се обнови!
