пишува: Светислав ВАСЕВ
Аферата Рекет, му зададе морално-вредносен удар на општеството. Или ќе го уништиме трулото и ќе му дадеме можност да закрепне или ќе пропаднеме на среден рок. И не, не сум песимист, ниту заговорник на црни сценарија. Замислете во некоја друга држава, пред се оние од Запад, главен обвинител да беше компромитиран со снимка од која јасно се слуша дека ветува поволности за обвинет, истражните органи да не можат да му го пронајдат телефонот, а кога ќе му го пронајдат тој да е преформатиран, потоа во време кога постојат за него индиции за сторен криминал слободно да ја напушти државата, зарем мислите сето ова да се случеше во Германија, В. Британија, Франција или пак САД, обвинителот ќе беше се уште на слобода? Оставам на Вас да си дадете одговор.
Секако да беше ова случај во некоја од горенаведените држави ниту обвинителството ќе одеше на одмор, туку ќе беа свикани сите обвинители, и оние кои заминале на ферија. Ноншалантното однесување на Русковска, ќе беше во најмала рака скандализирано во медиумите. Тоа кај нас не се случи. Зошто? Треба да си дадеме одговор сите заедно! И додека сите се прошетаа по одмори, и очигледно се издоговорија како да го работат случајот, народот чека одговори, изгуби одамна надеж во државата, му ја убија оние кои ветуваа живот.
Никој веќе тука нема дилема дека со оваа гарнитура ма власт одговорност нема да има. Зошто? Едноставно е, ако прочепкате подлабоко ќе нема крај на листата потенцијално обвинети. Почнувајќи од МВР, кои треба да одговорат како некој рекетирал со години, и тоа внимавајте! Милиони! А тие за тоа поим да ти немале. Потоа со службите од областа на финансиското разузнавање, па ако сакате на крак и обвинителството. Но на самиот врв ма одговорност е лично Зоран Заев. Зошто, затоа што на еден или друг начин целиот државен систем е под негова контрола, и знаете како вели законот, знаеле или морал да знае. Да за ваков милионски рекет, кој траел со години норал да знае.
И сега знаејќи го сето ова, зарем мислите дека со Заев на власт е можна разврска? Па секако дека не. Потребни се итни избори и смена на власта, што неминовно ќе се случи. Но тоа е само почетокот на решавање на проблемот. Потребна е темелна реформа во правосудството. Тоа е нешто за кое веќе пишував и сметам дека е потребен генерален реизбор на судии и обвинители, во постапка и методологија кои ќе гарантираат правичност и законитост. Тоа е најмалку што можеме да направиме за Македонија. Тоа сме и должни.
