Премиерот Христијан Мицкоски изјави дека нема нови барања од Бугарија, туку станува збор за обврски и услови кои, според него, биле прифатени од претходната влада во 2022 година.
Коментарот на премиерот доаѓа по информациите што се појавија во јавноста по вчерашната посета на претседателката Гордана Сиљановска-Давкова и министерот за надворешни работи и надворешна трговија Тимчо Муцунски на Софија.
Мицкоски нагласи дека уставните измени не се единственото прашање што стои на патот кон европските интеграции, туку претставуваат само почеток на дополнителни обврски што би следувале.
„Не се само промената на Уставот и внесувањето на дел од бугарската заедница во Преамбулата. Тоа е само почеток. Со тоа ја отвораме Пандорината кутија. Следува Акцискиот план, следува работата на Историската комисија, следува Протоколот 2, каде што работата на Историската комисија е само едно од барањата. Таму има можеби петнаесетина нови барања што ние како држава треба да ги исполниме. Нема ништо различно од она што денес го слушаме и од она што го слушаме во континуитет од 2022 година, кога, за жал, претходната влада го прифати тоа“, изјави Мицкоски.
Сепак, премиерот порача дека останува оптимист по разговорите што ги имал со германскиот канцелар Фридрих Мерц и францускиот претседател Емануел Макрон на Самитот на Европската Унија и Западен Балкан, кој минатата недела се одржа во Тиват.
„Сè уште сум оптимист кога станува збор за разговорите што ги имав со канцеларот Мерц и со претседателот Макрон, затоа што она за што разговаравме на тие средби е сосема различно од она што беше разговарано на вчерашниот состанок. Мора да бидеме оптимисти и да работиме, но истовремено и да ги штитиме македонските национални интереси“, истакна Мицкоски.
Претседателката Гордана Сиљановска-Давкова, по вчерашната средба во Софија со потпретседателката на Бугарија, Илијана Јотова, потврди дека официјална Софија очекува исполнување на обврските што произлегуваат од протоколите и работата на Заедничката историска комисија.
„Не се во прашање само уставните измени, туку и други барања поврзани со протоколите што произлегуваат од работата на Историската комисија“, изјави Сиљановска-Давкова.
Во меѓувреме, евроамбасадорот Михалис Рокас порача дека усвојувањето на уставните измени останува услов за напредок во процесот на пристапување кон Европската Унија. Во однос на германско-францускиот нон-пејпер, Рокас нагласи дека тој не може да го замени официјалниот преговарачки процес, кој продолжува со отворањето на преговарачките кластери.
