Петре Кривчевски
Дека не држи магарето да го критикува зајакот за големината на ушите е поентата на народната која како лика ем прилика ни ја отсликува и муабетов што следи подолу.
Имено со кој образ, па и право ако сакате, тазе олигархот ем неговата висока мода заменичка се топорат по пресови и пукаат од сите оружја за некакви криминали и злоупотреби?
Ама, чекајте! Ако некој треба да ја затне муцката и да се претвори во мумија (но не на маскембалот туку во животот) тоа е токму од Муртино канибалот. Ако и трунка намус има оваа подбишега од политичар само за судскиот процес, односно аболицијата за „Глобал“ и сумата од неверојатни 7-8 милиони (евра не денари) жив в земи треба да пропадни. Тој – ѓон, топук, небаре за него не се однесува – ич не му чуе. Или пак големото добро утро компањонка, кир(иј)а Радмила, која „Луј Вито“за купи-ден-помини го има и како на модни писти се шета по тоа телевизиите игнорирајќи ги фактите за кириите, а соли етики и сее критики за злоупотреби.
Едноставно да не знае човек дали да ги покудува што во очи ги гедаат и лажат „другарите“ со средната класа прикаските или да ги критикува што не ги вадат од уста, а ваму патолошко дигаат пара – тарапаана. Или, пак, на ниво на национални интереси. Се испотепаа со нивните постари да се прикажат за државотворци, а име, знаме, устав, територија… абе уште петокраките што не си ги испродадоа (иако и ними ги офарбаа). И пак кичма ќе виткале и пак име менувале. Ама знаете зошто? Не, не за нивни хациенди и луксузи, туку за наше (и ваше!) – народно добро. Ете. Видиш? А ние не сме занеле!
Значи кое безобразие човече од наследниците на црвените лопингери кои барем пред јавноста излегуваа во скромни одела, но овие бе брате и валкан капитализам критикуваат и чиста буржоазија практикуваат. А, и ова! Ачик со наши очи видовме и асли од нивна уста чувме дека кога ќе дојделе на власт… од чистачка до директор се` ќе било партиско. Арно ама другата снимка пак, таа со Виц’то, кажува и нешто друго: партијата-партија ама парата за братот.
Посебна тема, башка муабет е и тоа што чекајќи на бравот сами да му паднат не најдоа за згодно да седнат и една пуста програма да напишат. Демек, кај и да е на народот ќе му збоктиса и сам промени ќе посака. И да, можеби е и така ама нека бидат спокојни – ними не сака ни да ги смисли, а камо ли одново на власт да ги донеси. Таа е суштинската суштина која ги чини опозиција цела една деценија со извесна иднина – на повидок ништо поарно не се наѕира.
Срцки, тие! Па какво поарно кога вадат зрцки да се служат со трикови и измами место со проекти и програми. Еве, прошверцуваа и детонираа и десетици „бомби“ арно ама од толку народ што не ги мириса рејтингот не им се ни помрдна. А пак сега, откога сите позначајни економисти (Јовановски, Ивановски, Узунов) им ја треснаа вратата ќе плаќале италијанска агенција програма да им правела. Ако, нека, само (пред)весниците околу веќе обзнанија: од мафија за мафија, со кој си таков си.
Мајтап? Нее! Та овие се другарки и другари и „испоцркаа“ за средната класа. Тие на селаните (уште повеќе, каде-каде!) ќе им ги зголемат субвенциите, на службениците платите, на пензионерите пензиите… Абе на се живо, жими покојната ми мајка, а не како овој режимот што гради слободни зони, (авто)патишта, спортски сали, училишта, клинички центри и слични глупости. Не-не, не се секирајте тие за пола година ќе ја „суредат“ државата и ќе ја внесат во Европа откога ќе ја турнат сукњата и свиткаат кичмата. Еех, се арно само уште да имаше пустото кој да им поверува или, ако не, барем да ги пораздрма и разбуди.
Но, патем речено, по кој пат, ви се молам, ќе се обидуваат да се прикажуваат за душегрижници (а ваму делуваат како душовадници) кога и дечињата и врапчињата научија дека лагата и кражбата им се генетика. Тоа е, кога ќе сумираме и резимираме фијаско десетката не им бега, сега и забиберена со „дупла“ оставка. Ете таа вистина и разбивање на илузиите ја прави уште поголема маката ем прпата од судница столицата.
П.С. Ако некој се осети навреден или погоден од написов ич нека не се залажува и на суд нека не помислува. И јас го признавам единствено судот на партијата и ја почитувам само на претседателот аболицијата. Како Јоже, како Зоки…
