Македонска нација
ВМРО-ДПМНЕ освои 51 пратеничко место во Собранието, доволно со стариот коалиционен партнер ДУИ да формира влада. Меѓутоа, само наивните можат да веруваат дека тоа ќе биде лесно, откако СДСМ го крена цензусот на барањата на албанскиот политички блок – двојазичност, федерализација на земјата и др.
ДУИ самата бараше победникот од македонскиот и албанскиот блок да направат коалиција. Но, ако ДУИ притиска со овие барања што ги заговараше Заев и ја направи истата грешка како ДПА која излезе од Владата во 2008, ќе стане една минорна незначителна партија.
Одговорноста на опозицијата е огромна, особено по ветувањата кои ги даде на албанскиот блок, а кои ја доведуваат во прашање унитарноста на земјата.
Западните мешетари кои направија еден куп проблеми низ светот и секаде каде што се замешаа има крв и солзи, имаат голем дел од вината за она што се случи во земјата. Тие му даваат поддршка на Заев за тој да ја освои власта, а потоа да го смени името, да ја федерализира државата, без разлика на последиците по македонскиот народ.
Обидот на СДСМ да ја престави употребата на албански јазик на целата територија како граѓански концепт за подобро меѓусебно разбирање нема подлога, зошто тоа води наместо кон интеграција, кон дезинтеграција на земјата.
На последниве избори, Македонскиот народ ги поддржа реформите во државата што ги понуди ВМРО-ДПМНЕ. Тие сакаат да се стави крај на политичката криза која предолго трае и да се стави крај на поделеноста меѓу Македонците.
ВМРО-ДПМНЕ ќе формира Влада, но таа нема да биде стабилна, бидејќи нема големо мнозинство од 63 пратеници како што се бараше. Можеби за година две ќе имаме нови избори, но, како и да е, Македонија од оваа криза ќе излезе многу посилна.
Возобновена како Демократска Партија за Македонско Национално Единство, во чие име останаа да светлат и четирите историски букви на Внатрешната Македонска Револуционерна Организација, од своето формирање до денес одлучно застана во одбрана на националните интереси на македонскиот народ и држава, а по 2006 година како партија на власт, со спроведените реформи и со својата економска политика, дури и во услови на светска економска криза, стана главен двигател на економскиот развој на земјата.
Претседателот на ВМРО-ДПМНЕ Никола Груевски најави дека по изборите ќе има големи кадровски промени, тие се за доброто на партијата и на државата и треба да му оставиме простор со новата гарнитура да ја продолжи економската програма, која досега овозможи намалување на невработеноста на рекордни под 24%.
За да земјата стане здрава и модерна држава, резистентна на политиките на соседите кои го оспоруваат македонскиот народ и правото на сопствена држава, Македонија треба да има здрава економија, образован кадар, здрав и згрижен народ, како и историја изградена на цврсти докази кои не може никој да ги оспори.
Политиката на Владата на Република Македонија, како и големата поддршка која македонскиот народ му ја дава на ВМРО-ДПМНЕ (450.000 гласачи) укажува дека идниот премиер Никола Грувески и неговиот тим се наоѓаат на вистинскиот пат.
Во минатото е изгубено многу време, време кое денес треба да се надомести.
Меѓутоа во трката да се надомести загубеното време, може и да се погреши. Всушност, само оној кој работи може и да згреши.
Македонскиот народ очекува од Никола Груевски, Македонија да ја изгради како држава со која ќе се гордее секој Македонец.
Вечна да е Македонија!
