САМО НОВИ ПАРЛАМЕНТАРНИ ИЗБОРИ СЕ ИЗЛЕЗ ОД ПОЛИТИЧКАТА КРИЗА ВО СОГЛАСНОСТ СО УСТАВОТ И НИШТО ДРУГО, ОСВЕН НОВИ ПАРЛАМЕНТАРНИ ИЗБОРИ ЗАЕДНО СО ЛОКАЛНИТЕ!
Пишува Тодор ПЕТРОВ
Не постои уставна опција за избор на Влада без мандат од Претседателот на Републиката. Изборот на Влада без мандат од Претседателот на Републиката претставува грубо кршење на Уставот! Овластувањата на Претседателот на Републиката за доверување мандат за состав на Влада завршија со 9 јануари 2017 година. Се’ после 29 јануари во врска со избор на Влада претставува злоупотреба на службената должност и самовластие и од Претседателот на Републиката и од пратениците.
Во членот 90 од Уставот не постои опција втор мандатар.
Единствена опција, бидејќи не постои уставен рок за распуштање на Собранието доколку пратениците не состават Влада, е одлука на пратениците за распуштање на Собранието и нови парламентарни избори заедно со локалните избори! Тие што бараат избор на Влада без мандат од Претседателот на Републиката, сметаат дека таа одлука на Собранието не подлежи на оценка на уставноста. Уставниот суд по таква иницијатива би се прогласил за ненадлежен, бидејќи не оценува согласност на дејствија со Уставот, туку само на закони и општи прописи.
Собранието не може ниту да гласа доверба на Владата за да и’ го одземе мандатот, бидејќи таа само ја врши должноста до изборот на нова Влада. Нејзе мандатот веќе и’ престанал со распуштањето на Собранието пред минатогодишните парламентарни избори. Актуелен вршител на должноста министер не може ниту оставка да поднесе, затоа што нема мандат. Може само да го извести вршителот на должноста премиер дека престанува да ја врши функцијата вршител на должноста министер, по што го заменува заменикот министер а таму каде што нема ниту министер ниту заменик, функцијата ја презема вршителот на должноста премиер, до изборот на нова Влада.
И да ја отфрлат т.н. албанска платформа, и нејзините потписници и СДСМ, како услов да добијат мандат за состав на Влада, никој не може да им го одземе правото на пратениците и на Владата во текот на мандатот да ги предложат сите барања од т.н. албанска платформа, бидејќи се овластени предлагачи во Собранието.
Затоа, пратениците не смеат да пристапат кон избор на претседател на Собранието, кој ги распишува парламентарните и локалните избори, доколку претходно не се постигне договор за продолжување на мандатот на градоначалниците и советниците на општините и градот Скопје и распуштање на Собранието заради организирање на парламентарни и локални избори во ист ден.
Треба сериозно да се пристапи кон иницијативата најмалку 150.000 граѓани да предложат донесување на нов Устав односно да го вратат во сила и Уставот од 1991 година и Законот за територијалната организација на локалната самоуправа од 1996 година.
